Dialuna mainta 18 di maart, Aruba por a disfruta di un bunita acto protocolar cu Gobierno di Aruba a organisa na Plaza Libertador Betico François “Betico” Croes. Presente na e acto protocolar tawata Gobernador di Aruba, Gobernador di Corsou, Gobernador di Sint Maarten, Presidente di Parlamento sr. Ady Thijsen, miembronan di Parlamento di Corsou y Aruba, Griffier di Parlamento, Ministernan, Secretaris di Ministerraad, Consuladonan y un publico grandi di nos comunidad.
Prome Minister Evelyn Wever-Croes a entrega un discurso pa nos pueblo encurashando tur pa sigui uni pa asina hunto nos por logra metanan pa e pais aki y paisnan den Reino por bay dilanti
“Awe nos a bin hunto pa conmemora y celebra e hecho cu 43 aña pasa Aruba a pasa na pertenece na e paisnan cu tin su propio simbolonan di identidad: nos pais a haya su Himno y su Bandera. E tempo ey, na aña 1976, Aruba tabata parti di Antiya Hulandes, y den curason di nos pueblo tabata biba e deseo di ta liber. E gran politico y estadista di e tempo ey sr. Betico Croes (d.f.m.), a realisa cu un pueblo no por ta liber si e no tin su simbolonan di identidad y libertad.
Ami tabata den Wilhelmina stadion e dia ey, mescos cu varios di boso, y a yena mi cu un orguyo inmenso di mira e bandera bay halto pa prome biaha. Mes momento tambe un sentimento di compromiso, pa percura cu Aruba sigui ta un pais liber.
Como subrina di Betico naturalmente e amor pa nos pais, nos himno y nos bandera, a wordo inculca den mi desde chikito. Simbolonan cu mi ta corda, especialmente tempo cu mi tabata studia den exterior, cu tabata duna mi forsa pa continua.
Awe como Minister President di nos pais, mi tin e mesun sentimento di orguyo cu 43 aña pasa, y mes momento e sentimento di compromiso, pa hiba nos pais padilanti, pa enfrenta tur e retonan y crea progreso y bienestar pa tur ciudadano.
E colornan di nos bandera tin nificacionnan especial. E blauw di nos lama, e cora di e sanger di indjan y e cariño y amor pa nos isla, e blanco di e santo di nos playanan y puresa di curason di nos hendenan, e geel di ambundancia di antaño di industrianan di oro, fosfato y aloe. Esaki a forma nos bunita bandera y nos identidad.
Nos himno, Aruba Dushi Tera, a bin di ta un cancion popular cu hopi sentimiento patriotico. E cancion a wordo componi na 1951 pa sr. Padu Lampe y sr. Rufo Wever, y pa haci’e di un cancion popular pa un himno, mester a agrega un tercer couplet, componi pa sr. Hubert Lio Booi.
E di tres couplet ta contene e esencia di nos ser: Grandesa di bo pueblo ta, Su gran cordialidad
Cu Dios por guia y conserva, Su amor pa libertad. Awe, laga nos reflexiona riba esaki.
E cordialidad di nos pueblo, E amor pa libertad.
Y Sr. Betico Croes a scoge e fecha di 18 di maart como e dia di nos himno y nos bandera, pasobra e kier a duna reconocemento na e esfuersonan haci anteriormente, den añanan 40 y 50, pa nos bira baas den nos mesun cas. Cu e gesto aki, Betico kier a crea union, y e tabata hopi exitoso den esaki. Betico a sa di uni nos pueblo, y scogiendo e fecha di 18 di maart pa bira e fecha di nos himno y nos bandera, tabata un muestra di grandesa.
Un pueblo uni, hamas por ser venci. Esaki a conta pa nos lucha pa nos Status Aparte, y pa e lucha pa nos haya nos propio himno y nos propio bandera. y e ta conta awendia ainda.
Aruba ta enfrentando retonan grandi. Retonan financiero, retonan economico, retonan cu e situacion na nos pais bisiña Venezuela. Mescos cu den pasado, ban uni pa nos enfrenta e retonan y surpasa nan; mi tin tur confiansa cu nos lo ta exitoso un biaha mas.
Y esaki ta momentonan cu ta exigi UNION den nos pueblo na Aruba y UNION cu nos rumannan den Reino. Union ta nos forsa.
Pa surpasa e retonan nos mester tambe di vision. Vision unda nos ta mira Aruba aki 10, 20, 30 aña. Vision a traves di innovacion, con nos ta prepara nos yiunan y nan yiunan pa nan posicion den un mundo, cu ta cambiando hopi lihe. Di naturalesa nos ta un comunidad sumamente creativo, mira e creatividad riba un dia manera awe, of durante periodo di carnaval. Pero ta yega un momento cu nos ta perde esaki door di e desafionan diario. Y p’esey, si nos kier innova, si nos kier prepara nos muchanan pa trabounan cu awe no ta ni existi, nos mester mantene e creatividad ey, a traves di enseñansa y a traves di innovacion.
Pero cu vision so nos no tey ainda. Nos mester tin determinacion. Nos mester ta determina den logra nos meta: un miho Aruba pa tur ciudadano, irespecto e desafionan. Irespecto con dificil e por ta awo.
Y finalmente mester di curashi. Curashi pa tuma e decisionnan dificil cu mester wordo tuma, sabiendo cu esaki lo trece prosperidad y bienestar pa tur despues.
Ta tuma vision, curashi y determinacion, pa nos atende cu nos retonan, pa nos surpasa nan y pa asina nos conserva nos libertad, manera nos ta canta tur dia den nos himno.
Den e dianan prome cu e celebracion di nos dia nacional, nos dia di himno y bandera, mi a haci bishita na algun scol. Pa mi scucha y mira con e alumnonan ta preparando pa e dia nacional, pa comparti cu nan e historia di nos himno y nos bandera, y pa comparti anecdotanan.
Durante mi bishita e aña aki mi a haci e alumnonan un pregunta: “Ken di boso ta stima Aruba?”
Tur man di e alumnonan ta bay halto, sin duda, practicamente mesora cu nan scucha e pregunta. Hasta algun ta bisa aserca, “dimes”, “claro”. E ora mi ta puntra nan con nan ta mustra cu nan ta stima Aruba, y aki ta caminda mi ta haya hopi contesta interesante:
– Bo ta cuida Aruba, bo ta tene Aruba limpi, y bo ta cuida su naturalesa
– Bo ta yuda esnan cu mester di ayudo
– Y ami ta bisa aserca: bo ta haci bo best pasobra Aruba mester di bo.
Awe mi kier pidi henter nos comunidad, mescos. Mescos cu nos muchanan, mi kier pidi nos tur pa ban stima Aruba, ban cuida Aruba y su naturalesa, ban yuda esnan cu mester di ayudo. Especialmente e aña aki, cu ta aña di famia y di cuido di nos muchanan.
Cada biaha cu nos scucha of canta nos Himno, ban renoba nos compromiso pa den union nos duna tur cu nos cada un por duna, pa hiba nos pais padilanti.
Esaki ta conta naturalmente pa Gobierno, y como Minister President mi ta confirma awe nos compromiso na nos comunidad cu nos ta y lo haci tur loke ta na nos alcanse pa hiba nos pais padilanti, teniendo na cuenta e principionan di bon gobernacion, husticia social y integridad.
Pero e compromiso, di haci tur locual nos cada un por pa hiba nos pais padilanti, no ta conta pa Gobierno so. E ta conta tambe pa Parlamento, pa controla gobierno y mantene gobierno riba e rumbo corecto. E ta conta tambe pa demas institutonan, tambe pa prensa.
E compromiso di haci tur locual nos por pa hiba nos pais padilanti ta conta tambe pa tur ciudadano di nos pais. Ban enfrenta e retonan diario cu e mesun fervor cu nos himno ta bisa. Pa nos lucha pa mantene nos libertad.
E dia di awe, esta Dia di nos Himno y Bandera ta brinda nos e oportunidad pa reflexiona, yena nos cu inspiracion, curashi y amor patrio, pa den union nos atende cu tur reto, pa garantisa felicidad di pais Aruba”.
Prome Minister Evelyn Wever-Croes a termina su discurso gradiciendo tur presente pa nan presencia, especialmente e invitadonan cu a bin di otro pais pa celebra cu nos. Esaki, Prome Minister a expresa ta e muestra di union entre nos pais y islanan.
“Esaki ta duna mi tambe e speransa di e UNION cu nos mester logra, tanto aki na Aruba como cu nos rumannan den Reino”.
Finalmente, Prome Minister a gradici e Minister encarga cu Cultura Xiomara Ruiz-Maduro y su comision pa organisa e manifestacion cultural di diadomingo atardi y e acto protocolar dialuna mainta, cuanan sigur a kibra tur expectativa.
“Feliz Dia di Himno y Bandera, y Cu Dios por guia y conserva e amor pa nos libertad”.