Home Local CASO HIT AND RUN TANKI FLIP: Aruba ban coopera cu famia y...

CASO HIT AND RUN TANKI FLIP: Aruba ban coopera cu famia y cu autoridad, ban exigi y percura pa e persona cu a dal Sra. Anna Quandus sali y bin dilanti AWO!

No ban laga e caso aki bira un otro Cold Case!

Oranjestad – Tanki Flip
Aruba completo ban yuda autoridad haya e auto y e chauffeur cu a hit and run Sra. Anna Quandus Gavidia. Anna tawata haciendo sopi y a dicidi di crusa caminda pa bay busca un pida Yerbi Hole pa duna e sopi mas smaak.

Anna no tawata sa cu despues di e Parada di Oranjestad un chauffeur curason frieu tawata riba caminda y tawata acercando net na momento cu Anna inocentemente tawata crusando caminda pa bay busca un pida Yerbi Hole cerca un bisiña. Un auto a bin di pazuid y e chauffeur sin su curason ta bati a dal Anna, un señora di 82 aña di edad. Mane un burdugo sin consenshi ela bay lague gravemente herida atras, e no a ni baha su velocidad, ni brake pa mira kiko a pasa cu e señora aki. Ni cu cacho un hende cu curason y sanger den su benanan ta haci algo asina.

E chauffeur cu un curason di ijs a dal Sra Anna, a lastre algun meter y a lage benta manera un animal e ta. Esey no ta tur, dos auto cu tawata bin su tras, a hala un banda y sigui bay, tampoco sin para pa baha mira kiko por a pasa e señora drumi parcialmente riba caminda y con nan por a yuda. Ken sa, posiblemente nan tur por tawata hunto prome cu e auto cu a dal señora Anna.

Momento cu e incidente a pasa, famia di Anna tawata paden di cas y a kere cu un auto lo a dal un cacho, mirando e forma con e auto a sigui core. Na e momentonan  ey, nan no por a pensa cu tawata trata di nan mama stima, nan wela Sra Anna Quandus.

 

Pueblo di Aruba, eyfo tin un of mas persona cu mester a mira algo y cu sigur tambe sa algo mas cu lo por yuda autoridad ponne man riba e burdugo aki. Lanta bo cara, mira na shelo y pidi Dios Tata Poderoso forsa pa bin dilanti y yuda autoridad trece e persona aki dilanti Husticia.

Famia ta pidi pa e chauffeur cu a dal nan mama dia 3 di maart, sali na cla, sea un homber of un muher, pone man na bo curason sali y enfrenta loke ba causa, bay paga pe, pa mayan bo consenshi si bo tin anto, por ta trankil. Bo tambe manera tur otro hende ta sali di un mama. Aki ta trata di un ser humano, un mama di yiunan cu ta stima nan mama, sali bin dilanti y para pa loke bo a haci.

Sra Anna Quandus mientrastanto ta luchando fuertemente pa su bida den Cuido Intensivo na Dr. Horacio E. Oduber Hospital. Su yiunan y demas famia ta hopi tristo, pa mira cu aki na Aruba algo asina por pasa y esun culpabel ta eyfo ta trahando, comiendo, hariendo cu su famia y amigonan. Mientras yiunan y famia di Anna ta tristo, ta pasa oranan largo na hospital cu e speransa cu nan mama, wela, ruman, tanta, amiga recupera y sali for di hospital.

 

 

Abo sa algo? Yama e Tiplijn di polis 11141 of Warda di Balashi 5852500 y puntra pa agente policial Sr SOPHIA,MEYE, OF CROES.

Ariba imagennan por mira Sra Anna Quandus bon y actualmente den Intensive Care Unit luchando cada dia pa sobrevivi.