Diabierna, Colegio Santa Famia na Pos Chikito a celebra Himno y Bandera na grandi. Prome Minister Evelyn Wever-Croes a haci un bishita na e scol na unda el a wordo ricibi pa muchanan contento y entusiasma hunto cu Cabesante di e scol Sigfried Kelly y docentenan. E scol a brinda Prome Minister un bunita show cultural na su yegada cu canticanan popular.
Klasnan 5 y 6, a haya bishita di Prome Minister den klas na unda tawata tin un interaccion hopi special. Prome Minister a keda contento cu e interes di nos muchanan pa conoce mas di e historia di nos simbolonan nacional. Alumnonan na final, a desea e Premier un feliz dia di Himno y Bandera.
Prome Minister a elogia e maestronan pa a tuma tempo pa siña nan klas e historia di nos himno y bandera. Dia 18 di maart, Aruba ta celebra un di e logronan grandi di Betico, of cu Betico a contribui na nan grandemente, esta nos Himno y nos Bandera, simbolonan di union y identidad di un pais. Tambe e hecho cu awe Aruba tin su propio gobierno, su propio ministernan, su propio Parlamento, su propio moneda. Y tur esaki a inculca e sentimento di orguyo den nos Arubanonan. Gobierno su meta ta pa e historia aki hamas wordo lubida.
Prome Minister na final a entrega un cupcake cu colornan di nos bandera y un pamfleta cu informacion di e historia di Himno y Bandera.