Aruba ta den pleno preparacion pa su gran celebracion di Dia di Himno y Bandera, unda nos ta celebra en grande nos orguyo y aprecio patriotico. “Como un bon Arubiano, sea bo a nace kinan of bo ta bibando riba e baranca aki, bo a siña stima y respeta tur loke Aruba tin y cada un di nos mester haci esfuerso pa sigui contribui na mehora e condicionnan di bida, conservando e fundeshi di nos antepasadonan pa loke ta trata norma, balor y principio”, Parlamentario Sue-Ann Ras (MEP) a cuminsa na bisa riba e tema aki.
Segun Ras, no ta pornada durante e anochi di Poeta di Patria, un di e caracteristicanan di nos hendenan cu mas a resalta den varios poema tabata e tema di cordialidad. “Incluso den nos himno, e palabra cordialidad ta bin dilanti, ya cu esey tabata y ta simbolisa un di e elementonan fundamental di nos hendenan, cu a y ta contribui na forma nos gran pais tanto nacional como internacional”, Ras a sigui bisa. Segun e parlamentario, cordialidad ta e humildad, e amabilidad y e gentileza di un persona. Un concepto cu ta referi na e cualidad of caracteristica di cordial: cariñoso, afectivo, amabel.
“Aunke por mustra insignificante, e esfuerso cu cada un realisa den su forma di trata otro, ta transforma den un esfuerso colectivo, cu ta yuda pa e cosnan sosode. Si nos tur participa cu optimismo, lagando un banda negativo, pensa pa soluciona, no con pa complica, pa no warda pa nan bisa bo con of kico pa haci, sino tuma iniciativa y determinacion pa logra algo, participa den bida cu e responsabilidadnan cu ta coresponde cada un di nos como ciudadano di Aruba, brindando semper un man na otro den loke por, e progreso di su entorno lo ta e grandesa di nos pais.
INCULCA AMOR PA BO PATRIA
E amor pa bo patria, no ta algo cu solamente mester sosode na scol, segun Ras. E amor ta cuminsa na cas, den e forma con e mayornan ta trata tur loke tin di haber cu Aruba. Con nos ta anda cu otro, con nos ta respeta otro y mas cu tur cos, con nos ta trata otro. “Esey ta e prome refleho di amor patriotico cu mester resalta, pa asina e mucha tin un fundeshi solido di kico ta amor pa patria. Na scol e lo siña mas y amplia su conocemento riba otro aspecto di su pais, manera; historia”, Ras a continua bisando.
P’esey segun e parlamentario, e curiculo y tambe nos historia tocante Status Aparte mester ta bon ancra den nos sistema di enseñansa, pa nos educa nos muchanan cu e berdad, pa nan no haya niun duda di kico kiermen ta un bon Arubiano, cu ta stima su pais, su bandera, su escudo, su historia, su cultura y su idioma. “Bo pais mester ta loke bo ta stima, sinti bo orguyoso, di loke e ta y loke bo kier p’e ta. Ta e unidad di rais, unda e ser humano ta sintie realisa como Arubiano, den un vivencia humano integro, unda e sociedad ta briya den su totalidad. Feliz Dia di Himno y Bandera y sali celebra e dia aki como un bon Arubiano”,Ras a finalisa bisando.