Pa di 7 aña consecutivo ta organisa Poeta di Patria, cu ta un idea di sr. Atan Lee, ya cu e ta sinti e necesidad pa nos expone nos amor pa Aruba via di poesia. Pa 2019 Ministerio di Cultura, DCA, Comision Arte di Palabra, CCDN y Grupo Corector di Papiamento a percura pa un anochi masha anemo, unda 20 poeta a haci nan declamacion di poesia propio, reflehando nan amor pa nos cultura. Parlamentario Sue-Ann Ras tambe tabata presente y ta aprecia cu e aña aki tabata prome biaha, cu a haci e evento na Scol di Arte na San Nicolas y mester remarca cu e opcion tabata uno bon acepta, ya cu e lugar tabata yen y por a disfruta di un dushi biento henter anochi.
MAS PARTICIPANTE
E aña aki tabatin mas participante. Un total di 23 poeta a inscribi, pero durante e anochi final, 20 a presenta. “Ta di aplaudi y admira cu e evento aki semper ta conta cu participacion di e ser masculino, unda cu por mira interes di diferente edad ta competi”, Ras a expresa. E ganadornan a resulta como lo siguiente: Melendy Bisslik Neuman ganadora absoluto, di dos lugar tabata Jhon Freddy Tobón Montoya y di tres lugar tabata Ruthy Vrieswijk Bergen.
META DI POETA DI PATRIA
E meta ta cu ta importante pa celebra y e evento aki y na mesun momento ta sirbi como un plataforma, pa crea y duna mas espacio na literatura na Papiamento. Poeta di Patria ta duna oportunidad unico pa expresa nos gran amor na nos patria y e balor cu nos ta duna nos pais. Tambe ta un oportunidad pa stimula bon uzo di Papiamento y uza creatividad linguistico, unda e palabranan ta bin den harmonia cu otro, treciendo un mensahe unico.
“Poema tabata un di e prome maneranan unda e literatonan grandi di historia a expresa nan sentimento- y emocionnan mediante e palabra skirbi.
Poema tin su propio caracteristica, cu ta hacie un genero propio y cu pa esunnan cu ta skirbie, mester tin un habilidad special. E estetico di poema ta relevante, ya cu semper ta pone den evidencia e sentimentonan di mas profundo di un persona. Masha masha pabien na e organisadornan y e participantenan, ” Ras a finalisa bisando.