Parlamentario Endy Croes ta splica cu diaranson awor 20 di maart hues lo duna un veredicto final den caso di Lotto vs Minister di Deporte Sr. Danqui Oduber. Manera ta conoci desde januari 2018 momento cu Minister Oduber a nombra un Directiva nobo pa Lotto pa Deporte cual ta masha normal den historia di politica momento cu tin un cambio den gobernacion a resulta cu e “parasitonan” di AVP nombra pa Mike Eman y Mike de Meza a protesta energicamente. Directiva di Lotto a hiba Minister Oduber corte den un procedura di un kortgeding. Durante cu hues a trata e caso aki a bin resulta cu e “parasitonan di AVP” aki cu bendicion di Dr. Schwengle y Mike Eman a cambia e statutonan di Lotto pa Deporte 17 di october 2017, esta casi un luna despues cu nan a perde eleccion y nan tabata sa cu nan lo no bin bek, na un manera di hipocrita pa asina nan mes keda sinta den dicho Directiva.
Sentencia den kortgeding
Hues a duna directiva di Lotto rason cu e cambionan di statuto y tambe hues a haya cu Minister nobo mester por traha cu dicho directiva. Statutonan ta stipula tambe cu bo no por sinta mas cu 2 termino di 4 aña esta 8 aña. Directiva actual tanto Da Sousa, Janga, Eli Kock, Kamperveen, Flavio Faneyte (un hefe na Elmar), tur e campañadornan directo di Mike Eman y Mike de Meza tin mas di 9 aña actualmente sinta cu lijm riba e stoel destrosando e Fundacion Lotto pa Deporte. Despues cu a perde e caso den kortgeding a sigui un caso cual nan ta yama “Bodemprocedure” y den e caso aki hues lo bay mucho mas profundo y cu detayes pa asina tuma un decision. Directiva actual no ta contesta Minister, no ta sigui vision di Minister, nan no tin un Jaarrekening desde 2014, 2015, 2016, 2017, 2018. Con bo por maneha un Fundacion asina? Statuut ta exigi pa bo tin un Jaarrekening na ordo dentro di 180 dia despues cu aña cuminsa. Pues nan ta diki diki den incumplimento cu nan propio statuut. Asina tin mil y un cos mas cu ta pasando den Lotto.
Sinberguenseria
Dia 20 di maart venidero Parlamentario Croes ta bisa cu su experencia cu e tin den corte ta imposibel cu un hues por tuma un otro decision. Miembronan di Directiva tanto manera Arnold Legrand (antes) y Da Souza kende ainda ta eyden a enrikece nan mes cu consientisacion di tur e otro miembronan. Da Souza por ehempel ainda den 2017 a cobra Lotto un otro suma di Afl.18.000 florin pa duna conseho y advies. Ta con sinberguensa e hendenan aki por ta? Pronto momento cu Bestuur cambia tur pero tur puito lo wordo saca for di macuto y pueblo lo haya sa pakico AVP nunca pero nunca mas por goberna e pais aki. Nos ta keda pendiente pa e veredicto final dia 20 di maart proximo!