Home Politics Parlamentario Edgard Vrolijk: “Un pais sin su bandera y sin su...

Parlamentario Edgard Vrolijk: “Un pais sin su bandera y sin su himno no ta un pais liber ni ta un pais feliz”

 

 

Dialuna 18 maart 2019 nos ta celebra na grandi nos Dia di Himno y Bandera. Un pais sin su bandera y sin su himno no ta un pais liber ni ta un pais feliz. Nos pais tabata un pais den un constelacion Antiyano y cu semper tabatin e deseo di ta un pais liber. Pero pa por ta liber un pais mester tin su propio identidad, caminda unda bo bay rond di mundo bo pais por ser reconoci pero tambe respeta. Cu e pensamento aki nos libertador a opta pa bin cu un concurso entre e muchanan pa  bin cu un diseño pa nos bandera y cu riba 18 maart 1976 pa prome biaha a ser hisa y nos himno Aruba Dushi Tera pa prome biaha a ser canta. Nos himno y bandera a percura pa uni nos pueblo y duna pueblo e forsa pa lucha hunto cu nos libertador Betico Croes pa logra nos Status Aparte dia 1 di januari 1986 y cu nos por ta un pais liber cu su propio identidad, esta cu su mesun himno y bandera cu cada un di nos te dia di awe ta orguyoso di e simbolonan aki.

Nos bandera y nos himno ta simbolo di union y cada bes cu e ser hisa y nos himno resona e ta duna nos cada bes e orguyo di bisa  “Arubiano mi ta” y ta yena nos cu speransa y sigur anhelo pa mantene nos pais como e Dushi Tera cu nos tur ta anhela. Un Dushi tera unda cu nos tur por biba den harmonia cu otro y unda nos tur ta respeta otro y sigur nos tur tin e meta di haci Aruba nos dushi hogar.

P’esey mi persona ta pidi pueblo pa celebra na grandi nos dia di Himno y Bandera. Laga nos bishita e diferente actividadnan rond Aruba y haci esaki uno familiar, pasobra e nucleo familiar y union den pueblo ta e futuro di nos pais y sigur ta laga nos recorda e pakico nos tin di stima y aprecia y repeta nos mesun pais. Un feliz dia di Himno y Bandera na cada ciudadano riba e baranca dushi aki yama, Aruba.