Diahuebs atardi a tuma luga un conferencia di prensa unda e directiva nobo di Fundacion Monumento 18 di Maart a invita e pueblo di Aruba pa e conmemoracion. Muzaninn Wever, Presidente nobo di e fundacion a sigura di ta hopi orguyoso cu e directiva nobo, cu ta cla pa continua cu e trabou haci den pasado pa e monumento como tambe lo traha pa e nomber y fecha keda resona un tiki mas den pueblo. Idea ta pa comunidad keda cu e sentimento di orguyo pa un monumento asina.
Muzaninn Wever a duna di conoce cu pa diadomingo awo, 17 di maart. pa 5:00pm lo tin e ceremonia pa honra e 2147 firmantenan cu a entrega e peticion na mesa rondo pa nos status aparte. Algo hopi importane e ta remarca, cu banda di e politiconan cu a traha pa esaki, ta na su luga ypa honra e personanan cu a sacrifica den e temporada ey, pasando cas pa cas pa colecta firma pa logra e entrega final.
Muzaninn Wever a afirma cu e monumento ta traha pa recorda y gradici e hombernan balente cu a pone nan firma den historia y como muestra di aprecio, ningun aña por keda sin reconoce nan contribucion pa locual awe ta nos Status Aparte.
Pa finalisa Wever a menciona cu e monumento ta conoci pa e “Eeuwige vlam”, e candela eterno di Aruba, pero pa mas di un aña caba e candela ta paga. Un peticion den nomber di e fundacion a bay pa Gobierno bolbe cende. Gobierno di su banda a contesta un aña pasa cu promesa di cende pero mirando cu nos ta yegando fecha di e celebracion 18 di maart, kier a logra na cende bek pero lastimamente Gobierno no a cumpli cu e Fundacion.
Dianan acercando ta pone cu un biaha mas ta spera di Gobierno pa cumpli pa por logra ainda di mira e vlam cendi. Tin cu bisa cu e fundacion a haya tur cooperacion di parti Arugas di cual nan ta sumamente agradecido, como tambe na Setar NV cu a facilita e life streaming riba e dia di e ceremonia. Mas den futuro tambe e fundacion lo desea di por mantene e monumento y/of restaur’e mirando cu ta for di aña 1996 a trah’e.
Fundacion Monumento 18 di Maart ta extende un invitacion cordial na e pueblo en general pa asisti na e conmemoracion y honra e firmantenan di nos Status Aparte.