ORANJESTAD- E lucha pa Aruba su Status Aparte a dura mas di mey siglo. Un lucha cu a inicia na cuminsamento di siglo pasa bou e guia inspirativo di Henny Eman sr. a mira su finalisacion riba 1 di januari 1986. E pioneronan di e lucha aki – Henny Eman sr., Shon A Eman, Juancho Irausquin, Betico Croes – a mustra un perseverancia y dedicacion enorme. Temponan tabata otro. No ta sin mas ta bula bay Hulanda pa discuti riba nivel halto e deseo ferviente di e pueblo di Aruba. Cada un na nan forma a contribui na e Status Aparte di Aruba.
Inicio di e lucha
Cu binimento di e refineria LAGO a start un conscientisacion politico na Aruba. Si prome cu esey politica no tabata hunga un rol di importancia, esaki a cambia den e añanan cu a sigui. Na 1931 315 hende homber por a vota y na 1941 e cantidad aki a subi na 1323. Na 1942 partido AVP a wordo funda oficialmente cu su lider Henny Eman sr. E interes den politica a crece tambe door di e lucha di Henny Eman sr. pa Separacion. Esaki a conduci cu na fin di 1947 y comienso di 1948 2147 hende homber (hende muhe no tabatin derecho di voto ainda) a firma un peticion cu a compaña un mocion cu a wordo entrega dia 18 di maart 1948 na Mesa Rondo, na Den Haag y despues tambe na Su Mahestad Reina Wilhelmina. Esaki a causa un impacto positivo na e lucha.
E grito pa autodeterminacion pa prome bes a wordo tuma na serio. E intensidad di e discurso di Shon A a impacta esnan sinta na e Mesa Rondo cu ne y a habri caminda pa mas autonomia pa Aruba. Danki tambe na e 2147 firmantenan cu a para fuerte pa nan anhelo, nan ideal. Na 1950 PPA a keda funda y na 1957 Henny Eman sr. ta fayece. Su yiu, e abogado di pueblo Shon A Eman a tuma e rienda over di partido AVP cu tabata creciendo. Na 1971 Gilberto Francois ‘Betico’ Croes ta bandona partido AVP y ta lanta su propio partido MEP. Pa 15 aña largo MEP a domina politica na Aruba.
Na prome instante MEP tabata pro un federacion di Antiyas pa despues bira un defensor di Aruba su lucha pa Status Aparte na 1973, pa despues boga pa un Independencia. Na 1977 Betico Croes a organisa un refenderum pa sAruba sea bira independente of bay den un federacion Antiyano. Aruba den forma grandi a vota pa independencia, loke a conduci na hopi tension. Pa Henny Eman, yiu homber mayor di Shon A Eman y masha envolvi politicamente, e cambio di MEP aki no tabata aceptabel. El a caba di termina su estudio di Ley y a regresa Aruba pa participa activamente den politica pa percura pa Aruba no bira independiente.
Henny Eman tabata di opinion cu Hulanda nunca por nenga Aruba su Status Aparte. El a rondona su mes cu hendenan capaz, entre nan dr.mr. Mito Croes, un erudita riba tereno estatal. MEP y Betico a bolbe cambia di opinion y a bolbe bay pa un Status Aparte, e lucha di e pueblo di Aruba. Mescos cu Henny Eman sr. y Shon A a haci prome cu ne, Betico tambe tabata organisa encuentronan y tabata biaha pa Hulanda pa haya atencion pa e lucha di Status Aparte. Su debatenan ardiente tabata hala atencion y e tabata wordo scucha. E tabata haci uzo di e mesun lemanan cu Henny Eman sr. tabata uza, manera Vox Populi Vox Dei y a bira e voz di Aruba. Mientrastanto partido AVP tampoco a keda keto y a keda fiel na e lucha di partido desde un principio ya cu un independencia tabata algo cu no por pensa mes riba dje. Na 1982 partido AVP a drenta gobierno central y a pone den su programa di partido cu Aruba mester haya sosten di tur partido pa por logra Status Aparte. Mito Croes a bira Minister di Asuntonan Estatal den e gobernacion ey. El a forma un grupo di trabou cu participacion di representante di tur e islanan. E grupo di trabou aki a traha un documento cu a sirbi como formula na e Conferencia di Mesa Rondo na 1983 pa logra e anhelo di e pueblo di Aruba, su Status Aparte.
Status Aparte a bira un realidad riba 1 di januari 1986. E base di esaki a wordo poni hopi aña prome cu culminacion 18 di maart 1948, ora cu un Shon A determina a dicidi pa entrega un mocion compaña pa 2147 firma di hombernan Arubano na Conferencia di Mesa Rondo. Un tempo cu biaha pa Hulanda tabata un cuenta grandi. Ta pesey mes cu e fecha 18 di maart a wordo scogi pa Betico Croes como dia nacional di Himno y Bandera. Aruba su himno a bira ‘Aruba Dushi Tera’ di Padu Lampe, Rudy Wever y Hubert Booi.
Henny Eman jr., yiu di Shon A Eman y nieto di Henny Eman sr., e prome luchado di nos Status Aparte, den oranan tempran di mainta di 1 di januari 1986 a yama bon bini na pais Aruba como e prome Premier di Aruba. Un par di ora prome cu Status Aparte di Aruba a drenta na vigor Betico Croes a haya su mes envolvi den un accidente pisa di trafico y a bay den coma. Den menos di un aña el a fayece a consecuencia di e accidente aki. E no a mira e Status Aparte pa cual el a lucha tanto bira realidad. Un destino cruel. Aruba a yora su yiu cu tabatin asina tanto di ofrece ainda, pero a bay demasiado lihe.