Home Local Directie Natuur en Milieu a haci un presentacion di Wetlands/Saliña na Sta....

Directie Natuur en Milieu a haci un presentacion di Wetlands/Saliña na Sta. Anna School

 

ORANJESTAD – En conexion cu clebracion di dia 18 di maart, dia di nos himno y bandera, Sta. Anna school a invita  DNM y Stimaruba pa haci presentacion. E presentacion a trata e topico di e importancia di e preservacion di e saliñanan  Bubali Plas y Spaans Lagoen, e flora y fauna ta presente na e sitio y con nos por yuda pa tene e lugarnan aki bunita y limpi.

E muchanan tawata hopi interesa den e sorto di mata(nan) cu ta crece den Bubali Plas y Spaans Lagoen. Den e areanan aki tin entre otro Lisdode, Jantje Zwemt, Mangelnan, Taya y tambe yerbanan.

E muchanan a keda encanta di siña di nos bestianan cu ta bishita y crece na e sitio. Manera cantidad grandi di parhanan, yuwana, lagadishi, spiriti’cabrito (cabay awa), barbuletnan, pisca, cocolishi, cangrew asina por menciona cantidad.

Stimaruba a presenta fotonan di antes tuma na e sitio, un comparacion bunita pa mira. Bubali plas por ehempel a crece increibelmente y muchanan ta asombra di su magnitude. Spaans Lagoen tin status di proteccion y ta bou maneho di Parke National Arikok caminda hende ta bay pa relaha y admira naturalesa y no ta lugar pa haci desordo of haci deporte.

DNM su representante a haya oportunidad di papia di e trabou cu nan ta haci pa preservacion, conta di e bestianan y matanan cu ta protehi. Tambe a bolbe ripiti e importancia di e cuido di nos medio ambiente.

Den e foto por mira e muchanan di Sta. Anna School cu cara contento, otro hopi concentra ta scucha di Sra. Olinda Rasmijn di Stimaruba. DNM lo keda bishita nos scolnan cu mas informacion relaciona na nos recursonan natural.