Home » SV Aruba Juniors cu homenage na Amado Rosina y Severo “Chago” Hernandez Dia di Himno y Bandera

SV Aruba Juniors cu homenage na Amado Rosina y Severo “Chago” Hernandez Dia di Himno y Bandera

by Admin
0 comment 76 views

 

Severo Hernandez de la Cruz miho conoci como Chago a nace na Republica Dominicana dia 8 di augustus 1964. Chago ta casa cu Luz Mary Hernandez y tin 5 yiu. Desde mucha Chago a hunga baseball den diferente division na su pais natal. Na 1991 cu edad di 27 aña Chago a muda pa Aruba. Aki el a hunga softball pa varios team entre otro Polar, Catiri Bufalo, Fast & Easy, Calabas y Club Dominicano. Tambe el a forma parti di Santo Domingo All Stars den añanan 90. Na 2007 Chago cu algun amigo ta lanta un team nobo bou di nomber di Quisqueya Softball Team. Quisqueya te ainda ta activo den Liga 40 y comercial.

Na 2010 Chago a cuminsa coach teamnan di little league Na Centro di Bario Noord den categorianan 5-6, 7-8 y 9-10 aña. Chago a sa di sali campeon cu e teamnan di 5-6 y 7-8, un y dos biaha respectivamente. Na 2016 Chago a dirigi CBN su team di 11-12 aña na campeon invicto. E mes un aña e ta representa Aruba na e Serie del Caribe cu a tuma luga na Puerto Rico. Su prestacion como coach a dune oportunidad pa representa Aruba na tres serie mundial di Pony League den categoria 9-10 na aña 2015 y 2016 na California y Lousiana respectivamente y na 2017 den categoria 11-12 na Virginia, USA.  

Chago ta bira miembro di Aruba Juniors su team di softball 50 plus na aña 2014 y na 2017 e ta acerca directiva di Aruba Juniors cu un plan pa forma un team di little league categoria 11-12 aña. Esaki ta wordo acepta cu mannan habri. Su prome salida como manager na Aruba Juniors ta den e Campeonato di ABBA, nan ta gana 13 wega y perde 5. Den 2018 e ta haci Aruba Juniors campeon di Pony League y sub campeon di Aruba North Litthe League. Actualmente Chago ta dirigi dos team na Aruba Juniors den categoria 11-12 y 13-14 aña. Banda di esaki Chago a sa di prepara hungadornan pa try-out cu teamnan profesional. Dos di su alumnonan a wordo firma pa Detroit Tigers y actualmente tin palabracion haci cu LA Dodgers pa posiblemente firma un mas.

E di dos homenageado riba Dia di Himno y Bandera na Aruba Juniors ta Amado Eulogio Rosina. Amado ta mas conoci como futbolista y musico. El a nace na Aruba dia 13 di september 1953. Ta casa cu Astrid Rosina Kock y tin dos yiu y dos nieto. Desde mucha a hunga varios deporte entre otro basketball, baseball y futbol. Como hoben el a hunga baseball den añanan 60 pa entre otro Oso Grape y Coco Rico bou direccion di Chipen Chirino. El a haci futbol su pasion y a destaca riba tereno hungando pa Dakota y despues Roma. Amado a participa cu Dakota den Copa Antiyano y a hunga den tanto seleccion di Aruba como seleccion di Antiyas Hulandes na Weganan Centro Americano y tambe Pan Americano. Entre Dakota y Roma Amado a sali mas di 25 biaha campeon di Aruba.   

Como musico Amado a dirigi e orkesta na Festival di OTI hunto cu Trio Huasteca, el a toca cu Dedhalavi pa varios aña y na varios hotel a deleita turista y localnan pa mas di 50 aña.

Mientras cu futbol y musica tabata su passion, e homenage na Amado ta pa reconoce su participacion den softball como hungador y dirigente. El a cuminsa hunga softball na aña 1977 pa Tromp Cement Production den liga commercial, cu despues a cambia di nomber pa Boomerang, bou direccion di Nemencio Jansen. Sin embargo na 2002 cu 49 aña di edad e ta pasa oficialmete pa liga veterano di softball cu su team di Boomerang bou maneho di Kenneth Alias. Na edad di 59 aña Amado ta drenta liga 60 pa Boomerang Ildo’s Lottery unda e ta sigui activo keto bay. Ta remarcabel cu Amado a hunga ful su carera di Softball di mas di 40 aña pa un solo team.  

Na aña 2003 Amado ta forma parti di e directiva di Federacion Liga Mayor di Softball como vice-presidente pa un duracion di 7 aña y despues ta presidi e federacion pa 8 aña consecutivo. Pues Amado a traha durante 15 aña como miembro di directiva di Federacion Liga Mayor di Softball.

SV Aruba Juniors ta sumamente satisfecho di por homenagea e dos deportistanan aki pa nan contribucion na deporte y na comunidad di Aruba. Aruba Juniors ta invita tur  miembro, famia y amigonan di Chago y Amado pa ta presente riba Dia di Himno y Bandera pa 2or di merdia pa presencia e merecido homenage aki. Manera tur aña e tradicion ta continua, bar y cushina lo ta bon surti, e sopi di seafood y plato di pisca no lo falta.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio