Februari di e aña aki, comision “Ken ta Betico” a wordo institui formalmente cu miembronan Manolo Giel y Guisette Croes. E comision lo percura pa graba e historia di Betico y e historia di nos Status Aparte como tambe historia di nos simbolonanan nacional. E estudio lo no limita su mes na e bida di Betico so, sino lo inclui tambe tur esfuersonan cu a wordo haci prome cu nos a logra nos Status Aparte. Den e trabou aki, lo traha hunto y lo entrevista e personanan cu a hiba e lucha hunto cu Betico, entre otro sr. Nel Oduber.
Den e siman aki cu nos ta den porta pa celebra nos himno y bandera, ta importante pa nos realisa kico ta e berdadero historia tras di esaki y traspasa e historia real di bida di Betico, su logronan y su lucha pa nos futuro generacionnan. Pa garantisa esaki, nos gobierno ta comprometi pa graba e historia aki, y inclui esaki den curiculo na scolnan, cu e meta pa preserva y inspira nos comunidad. Pa asina no tin discusion riba e parti importante aki di nos historia. E memoria di Betico Croes y su logronan pa nos himno y bandera mester ta eleva riba tur partidonan politico, riba tur gobierno. Esaki ta partimonio nacional, y nos mester preserve.
Un pueblo cu lubida su historia of un pueblo cu no conoce su historia, ta un pueblo sin futuro. Especialmente den e temponan aki cu nos ta enfocando hopi riba innovacion na Aruba, e vision pa futuro ta asina importante, y pesey e compromiso di nos gobierno, pa nos historia nunca bay perdi.
Dia 18 di maart, Aruba ta celebra un di e logronan grandi di Betico, of cu Betico a contribui na nan grandemente, esta nos Himno y nos Bandera, simbolonan di union y identidad di un pais. Tambe e hecho cu awe Aruba tin su propio gobierno, su propio ministernan, su propio Parlamento, su propio moneda. Y tur esaki a inculca e sentimento di orguyo den nos Arubanonan.
Prome Minister Evelyn Wever-Croes a desea e pueblo di Aruba un feliz siman di Himno y Bandera.
