Home » Premio Cultural Playa Pabao otorga na e mucha homber di Socotoro Eddie Ras

Premio Cultural Playa Pabao otorga na e mucha homber di Socotoro Eddie Ras

by Admin
0 comment 92 views

 

 

Eduard Anthony “Eddy Ras” a nace na Aruba dia 22 di januari 1950.                                          Eddy ta casa cu sra. Oneida Ras Valdez y nan tin 2 yiu: Natasha Y Eduard.

Educacion pa Eddy tabata hopi importante den su bida. El a bay 3 aña di Mulo  y John F. Kennedy School.

Eddy ta un deportista hopi conoci y popular na Aruba. E ta un persona cu a practica varios deporte y a sa di representa su isla Aruba y Antiyas Hulandes den casi tur deporte. For di chikito Eddy a cuminsa haci deporte den e barionan di Socotoro y Companashi.  Su mayornan: Sr. Elio Ras y Sra. Isabel Ras, a motivele pa haci deporte, debi cu Eddy tabata sufri di asma. Eddy a milita den team di Oso Grape, bao guia di e conocido entrenador, Sr. Chipen Chirino, den Little league. Den Junior league Eddy a hunga pa e team di Kodak bao guia di e legendario (d.f.m.) Sr. Luis Swaen.

Cu e dad di 16 aña, Eddy a pasa pa hunga  cu e team di Marlboro y a hunga nuebe aña como shortstop y tercera base. Eddy a participa den diferente campionato Antiyano cu Marlboro. Tambe Eddy tabata den e seleccion di Señior league.

Den e deporte di futbol Eddy a hunga for di hoben den e team di Aruba Junior y                              cu su 16 aña el a hunga den hoofdklas, despues Eddy a pasa pa hunga pa e team di RCA den cual el a hunga pa campionato Antiyano.                                                                      Tambe Eddy tabata selecciona den futbol Hubenil y Señior. Den varios ocacion Eddy tabata den seleccion di Antiyas pa weganan di Reino na Hulanda y Surinam. Y tambe sin lubida pa pre-cualificacion mundial, bao guia di e legendario (d.f.m.) Sr. Angel Bota, cu tabata coach di ekipo di RCA, B-class y a titula varios biaha como campion di Aruba. Eddy tabata campion di Junior y Señior pa varios aña.

Despues cu Eddy a sigui practica varios deporte mas entre otro: Ping- pong (campion B class), basket pa Aruba Junior y RCA, softbol (Aldo), Judo, etcetera, Eddy a opta pa drenta y keda den e deporte cu mas el a gusta esta tennis.                                                                                       Eddy su entrenador di tennis tabata Sr. Armando Vieira di Brasil na kende Eddy ta masha agradecido. Eddy ta ser considera como un di e mihor tennistanan di Aruba.                                                                                                Pa mas cu 15 aña largo, Eddy tabata campion di Aruba di cual tres biaha el a gana campionato Antiyano. Ademas di campionato local y Antiyano, Eddy a participa na clasiconan di Marlboro, ALM, torneonan Centro Americano, Sur Americano y USA. Eddy a yega di hunga contra e constelacion di hungadornan di fama mundial. El a haya experiencia di e profesionalnan, entre otro: Ivan Molina number 1 di Colombia, Jorge Andrews number 1di Venezuela,  Manuel Santana number 1 diSpaña, Tom Okker number 1 di Hulanda. Pancho Wathal y Stan Smith di USA, John James di Australia. Marlin Koek, Ralph Thung, Teo Gorbi, hungadornan di ranking Hulandes. Armando Cornejo di Chile, Agudelo di Colombia, Fransisco Gonzales di Puerto Rico, etc, etc.

For di aña 1973 pa aña 1975 Eddy tabata coach di e seleccion hubenil di tennis. E seleccion aki a participa den varios encuentronan internacional y a duna                                                                                                                                             bon resulato, incluyendo torneonan di J.I.T.I.C.

Desde 1970 Eddy ta entrenador di tennis y el a traha 25 aña na Aruba Caribbean Hotel/Golden Tulip.                                                                                                                        Desde aña 1996 te cu 1998 Eddy tabata entrenador na Costa Linda Resort & Casino y desde 1998 Eddy a sigui como entrenador na su mesun club: Eagle International Tennis Club Aruba. Mester menciona cu Eddie a habri caminda na unda nos  muchanan di “down sydrome” por practica e deporte di tennis

Dia 29 di maart 2010 Eddy a ricibi e condecoracion como Ridder in de Orde der Oranje Nassau pa tur loke el a haci pa deporte.

Actualmente Eddy no ta eherciendo e deporte di tennis pa motibo di un quebrante di salud.

Eddy ta agradecido na prome lugar na Dios pa su talento deportivo, su mayornan, y su entrenadornan en general.                                                                                                                                                                                                                                                          Sin lubida, Sr. Chia Brion (d.f.m) kende a duna Eddy hopi empuhe durante su carera deportivo.

Eddy su conseho na e hubentud ta: Biba saludabel, keda leu for di droga, practica deporte cu hopi dedicacion y diciplina.

                                                                                                                          

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio