Cu tin interes y preocupacion di parti di comunidad tocante ehecucion di Social Crisis Plan, ta di compronde. Specialmente si mira cu durante di 8 aña e veld social a sufri un abandono total, unda cu hasta den subsidio di varios instancia y fundacion a corta, lagando nan ta sangra financieramente. Durante conferencia di prensa dialuna ultimo, Parlamentario Sue-Ann Ras a elabora riba e 3 dianan di reunion intensivo cu 24 instancia.
LANDSVERORDENING ‘BEGROTINGSFONDS’
Dia 19 di december 2018 a pasa e ley di ‘begrotingsfonds’ pa sigura e implementacion di Social Crisis Plan ta efectivo y exitoso. Na mes momento a pone den articulo 4 cu e director di Departamento di Finansa ta esun autoriza pa ehecuta e pagonan di e fondonan y den articulo 5 a pone cu cada kwartaal lo presenta un raportahe di e estadonan di accion di cada instancia como tambe un bista di e gastonan uza di e fondo. “Actualmente ta 6% a uza di e fondo di Social Crisis Plan y esaki ta debi na e control rigoroso y structural di parti di team encarga. Cada pago ta bay via un ‘Ministeriele Beschikking’ y prome cu a haya e pago, mester a entrega un ‘programma van eisen’ unda ta specifica henter e proyecto y tin relacion directo cu e metanan di Social Crisis Plan,” Ras a confirma.
RESULTADO
“Mi mester bisa cu mi ta satisfecho cu e resultado y a demostra cu nos hendenan ta trahando pa mehora calidad como tambe servicio relaciona cu nos problemanan social. Nos a descubri algun punto cardinal cu falta den nos sistema social y intencion ta pa nos sigui amplia riba esaki”, Ras a sigui bisa. Loke ta remarcabel ta, cu nos hendenan tin cierto dificultad pa loke ta trata educacion of lantamento di un mucha y hopi biaha no sa con pa educa e mucha. P’esey mes ta importante pa bin cu programa intensivo y obligatorio pa e mayornan cu tin mester di esaki, paso realmente educa of lanta un yiu, no tin un manual cu ta funciona pa tur hende, pero si tin cierto aspectonan cu por aplica, pa e proceso aki cana mihor.
TRABOU DI PARLAMENTARIO
Awor ta toca turno pa Parlamento den su totalidad haya e documentonan di evaluacion studia. “Mi lo aprecia si tur mi coleganan, incluyendo esunnan di oposicion, repasa y studia tur e documentonan tambe, specialmente e parti di proyecto “Up to Date” di cada instancia, hunto cu e documentonan di pago di Departamento di Finanzas, cu tin exactamente poni tocante e 24 fundacion/instancia cu a haya placa y cuanto nan a haya di loke tin presupuesta. Y asina nan tambe por haci pregunta al caso y relevante relaciona cu e prome raportahe di e prome kwartaal di Social Crisis Plan”, Ras a indica. E peticion ya a bay na presidente di Parlamento, pa programa e reunion publico aki, na momento cu tur Parlamentario y instancia manera; CAFt y Algemene Rekenkamer haya e documentonan en cuestion y e tempo necesario pa repasa esakinan. “Di e forma aki si bo tin duda di kico ta pasando y unda e placa ta bayendo, bo por haci pregunta durante e reunion y door di a studia e documentonan y no djis bay grita eyfo cu no ta haci nada cu e Social Crisis Plan,” Ras a finalisa bisando.