Home » Parlamentario Sue-Ann Ras:  “De kogel is door de kerk” tabata nificacion di un logro historico

Parlamentario Sue-Ann Ras:  “De kogel is door de kerk” tabata nificacion di un logro historico

by Admin
0 comment 58 views

 

 

Durante conferencia di prensa Parlamentario Sue-Ann Ras pa fraccion di MEP a conta un poco di historia di e logro di Status Aparte. Esaki ta en conexion cu nos gran celebracion di Dia di Himno y Bandera dialuna proximo y semper ta bon pa nos sa nos historia real, basa riba documentacion, ya cu esey ta loke nos a haya como herencia y nos tin cu percura pa sigui traspasa esaki na nos generacion. 

 

12 maart 1983

“De kogel is door de kerk” tabata e expresion haci pa ex Minister Premier di Hulanda, Ruud Lubbers, durante e ultimo dia na Conferencia di Mesa Rondo na Den Haag. “E expresion aki a indica e culminacion di e logro di Status Aparte riba 12 di maart 1983, ora cu nos Libertador Betico Croes a yega na un acuerdo historico. Tabatin 33 punto di conclusion, cu a pone punto final pa Aruba haya su Status Aparte entrante 1 di januari 1986,” Ras a cuminsa splica. 

Betico Croes a acepta e exigencia cu Hulanda a impone, door di pone un fecha di independencia pa Aruba. “A pesar cu Betico tabatin sentimento mixto, e tabatin un vision y el a percura pa hinca un clausula sumamente importante. Esey tabata pa tin despues un conferencia di evaluacion unda tin posibilidad di pospone e fecha di independencia,” segun Ras. 

 

UN LOGRO HISTORICO 

No tin duda cu e pueblo di Aruba tabata anhela esaki. Cu esaki tambe Aruba a kibra e cadena di 12-8 definitivamente y Aruba porfin a bira un pais autonomo den Reino Hulandes.

E logro aki a sorprende tur hende, incluyendo ex Minister Premier di Hulanda, Ruud Lubbers, cu na final di e conferencia a uza e famoso expresion: “De kogel is door de kerk”. E acuerdo historico aki tabata firma pa 3 persona: ex Premier di Hulanda, Ruud Lubbers, ex Premier di Antiyas, Don Martina y lider di Aruba, Betico Croes. 

 

1996 FECHA DI INDEPENDENCIA

E sentimento di porfin Aruba a logra sali for di e constelacion Antiyano sigur tabata un satisfaccion total. Pero na mes momento Hulanda a pone presion cu mester yena e fecha di independencia, cual tabatin un lapso di 10 aña, pa discuti esaki y trece cambio den e fecha di independencia. “Esey ta netamente loke nos ex Prome Minister Nelson Oduber a haci dia 13 di juli 1990. Nos ex-Prome Minister Nelson Oduber a logra pa schrap e fecha di 1996 for di den Statuut, pero manteniendo e derecho di nos pueblo pa bira independiente via un Referendum unda cu mayoria dicidi esaki y por a conta cu sosten di 2/3 parti di nos Parlamento”, Ras a sigui amplia. 

“P’esey mi ta keda boga pa nos documenta nos historia y ancra esaki via un metodo den nos curiculo di enseñansa, como un parti fundamental di conocemento di nos historia tocante e lucha largo y sagrado di Status Aparte y educa y inculca esaki cerca nos mucha- y hobennan”, Ras a finalisa bisando. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio