Parlamentario Endy Croes a elabora den conferencia di prensa pidiendo pueblo di Aruba pa nos uni y celebra Himno y Bandera na grandi. Tabata 43 aña pasa den e proceso di e lucha pa realisa nos Status Aparte Gobierno Insular di Aruba riba e fecha 16 di maart 1976 a aproba e decreto di nos Himno y Bandera. Tras di e vision y liderazgo di e inmortal Betico Croes di partido Movimiento Electoral di Pueblo (MEP) a ehecuta e plan pa unifica nos pueblo y e instrumentonan pa logra esaki tabata sigur nos Himno y Bandera. Betico a logra esaki y asina a duna mas forsa y contenido na su lucha pa Status Aparte. Nos Himno y Bandera a bira nos orguyo cu a logra unifica Aruba. Despues cu Gobierno Insular a aproba nos Himno y Bandera a scoge e fecha 18 di maart 1976 pa oficialmente hisa pa promer biaha nos bandera di Aruba y a resona nos himno den un Wilhelmina Stadion completamente yena cu nos hendenan carga cu emocion y orguyo. Nel Oduber a forma parti di un comision kendenan tabata encarga cu e diseño di e bandera y tambe tabatin un comision responsabel pa bin cu un Himno. Pa cu nos bandera a haci un concurso na scol cual a produci 693 diseño y e deseo y diseñonan aki a wordo comberti cu ayudo di “Flag Research Institute” den e producto final esta nos orguyo y nos bandera di Aruba. Danki na e vision y determinacion di Betico Croes pero alaves danki na tur e comisionnan cu a traha incansablemente pa nos por a logra nos Himno y Bandera cual ta nos orguyo nacional. Parlamentario Endy Croes ta termina bisando pa laga nos haci e compromiso di sali celebra na grandi nos dia nacional dialuna awor den compania di nos famia y amistadnan. Briya Aruba Briya!!!
