Home » Dia 18 di maart nos ta celebra nos Dia di Himno y Bandera! “E grito di ‘Baas den nos mes cas’ di 18 di maart 1948 a muri dia 13 di october 1949”

Dia 18 di maart nos ta celebra nos Dia di Himno y Bandera! “E grito di ‘Baas den nos mes cas’ di 18 di maart 1948 a muri dia 13 di october 1949”

by Admin
0 comment 54 views

 

A bira un custumber caba cu asina yega luna di maart, partido AVP ta sali dilanti pa duna su propio interpretacion na e celebracion di nos Dia di Himno y Bandera. Hecho ta cu cada biaha AVP kier keda plak e fecha di 18 di maart na e grito di ‘Baas den nos mes cas’, pero no ta conta di e traicion cu a ser cometi contra 2147 firmante di un peticion haci na 1948. Ta p’esey mes MEP ta haya su mes obliga pa trece e historia den e version corecto pa pueblo mes mira con AVP kier sigui manipula cu e fecha di 18 maart.

 

Igualidad di 8-8

Na aña 1947/1948 AVP a colecta firma na Aruba pa sostene e lucha pa Separacion for di Antiyas. Un gran cantidad di ciudadano a kere cu sigur e politiconan cu a pidi nan firma lo para fuerte bao tur circumstancia pa e Separacion y prueba di esaki ta cu 2147 persona a firma.

Dia 18 Maart 1948 Shon A Eman a entrega durante e conferencia di Mesa Rondo e peticion cu e 2147 firmanan pa mas autonomia pa Aruba, e asina yama ‘Baas den nos mes cas.’ Alavez a ser acepta pa studia e deseo di Aruba pa tin un posicion special den Reino Hulandes y a nombra un comision pa cu esaki. Durante e eleccion di 1948 AVP a core campaña a base di e peticion aki y nan a logra haya 5 asiento y partido UNA 3. Na mei 1948 Aruba a haya igualdad cu Corsou (8-8) na momento di cambio di e Staatsregeling. Den formacion di e gobierno di e tempo ey e lider di NVP di Corsou, esta Da Costa Gomez, no tabata contento cu Corsou siendo mas grandi cu Aruba tin e mesun cantidad di asiento den Staten cu tabata 8. Door di e discusion ey Hulanda a manda Prof. van Poelje pa Antiyas pa regla e asunto aki.

Plan van Poelje y Interimregeling

Prof. van Poelje a bin cu dos concepto di ley. Un tabata yama Interim Regeling y e otro Plan van Poelje. E diferencia di nan dos ta cu Plan van Poelje ta regarda cu cada isla ta dicidi pa su mes cual departamentonan di gobierno lo kier traha hunto cu otro, mientras cu Interim Regeling tabata papia di e isla cu mas voto ta haya mas asiento. Henny Eman tabata inclina pa e deseo di Da Costa Gomez cu tabata kier e Interim Regeling. Na mei 1949 AVP a forma un gobierno cu NVP y Shon A Eman a haya un puesto di ministro sin cartera.

 

Traicion di AVP

Dia 13 di october 1949 den Staten di Antiyas tres miembro di AVP a vota hunto cu Da Costa Gomez pa e Interim Regeling, mientras cu Juancho Yrausquin, Fichi Croes y partido UNA cu tabata kier e Plan van Poelje a vota contra. Resultado di e traicion di AVP tabata cu Hulanda a duna Corsou 12 asiento y Aruba a keda cu 8 asiento. Cu e votacion aki AVP a vota contra pa Aruba por a haya mas autonomia y a traiciona e 2147 firmantenan. Di su regreso na Aruba, Henny Eman a tuma henter pueblo haci spektakel bisando cu “Aruba no a perde nada, pero ta Corsou a haya 12”.

 

E humiliacion di 12-8

Na mei 1950 Tweede Kamer a acepta e Interim Regeling cu e cambio di e 8-8. Pues esaki a bira 12-8. E tempo ey AVP no a reacciona y no a protesta, al contrario a bin fiesta na Aruba, pero pueblo Arubano si no a keda contento. Na augustus 1950 e Interim Regeling a ser trata den Eerste Kamer, unda e partidonan politico UNA y PPA a pidi pa rechaza e “Interimregeling”. Enbez cu AVP a sostene UNA y PPA, nan a keda keto, pasobra ya nan mes a acepta e areglo aki pa hinca Aruba bao di Antiyas. Cu e votacion tanto den Tweede Kamer como Eerste Kamer e humiliacion di 12-8 a bira realidad. Pues e hecho cu AVP ta insinua awe cu Status Aparte ta data di dia 18 maart 1948 ta un mentira flagrante. Riba e fecha ey e grito a nace pa ta ‘Baas den nos mes cas’ y e grito ey ya a muri dia 13 di october 1949! Durante henter e periodo despues di 1949 e lidernan di AVP no a papia mas riba Separacion y nan a muri bay sin por a logra e ideal aki.

 

Wega politico di AVP

Hecho ta cu e pueblo Arubano mester a warda dos decada pa porfin Aruba por a haya e berdadero luchador pa nos autonomia, nos Status Aparte, esta e gran estadista Betico Croes.

Pero kico nos ta mira awe? AVP kier converti nos dia oficial di 18 maart den un dia pa haci politica partidista y pa honra hende cu no a logra nada significante pa nos pueblo. E wega politico aki a rebiba momentonan tristo den historia di nos pueblo, unda cu 2147 persona a vota pa Separacion y nan a ser hinca hunto cu e pueblo den e 12-8 di Antiyas. Un cadena di 12-8 cu den apenas 12 aña (1971-1983) a ser rementa for di otro door di nos inolvidabel lider y estadista Betico Croes.

Finalmente e logro di Status Aparte no tabata riba un 18 di maart, pero dia 12 di maart 1983, ora cu a firma e acuerdo (no un deseo of mocion!) durante e Conferencia di Mesa Rondo na Hulanda pa Aruba haya su Status Aparte entrante 1 di januari 1986.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio