ORANJESTAD, Aruba – En conexion cu celebracion di Himno y Bandera 2019, Aruba Bank a organisa 3 tayer special pa muchanan. Aruba Bank a bishita 3 scol, esta Fatima College, Maria School y Scol Preparatorio Nos Paraiso, pa duna e studiantenan un experencia superior.
Dia 12 di Maart muchanan di Fatima College a ricibi tayer y informacion di steelpan. John Francis Jacobs a siña e muchanan con pa toca steelpan. Tur a keda masha contento cu e experencia unico aki.
E di dos tayer, ariba dia 13 di Maart alumnonan di Maria School a ricibi tayer di “bati pan” pa traha e famoso pan bati crioyo. Nelleke Cardenas, kende tin pasion pa cushina, a siña e muchanan con pa prepara e delicioso y tradicional plato.
E ultimo dia di tayer tabata dia 14 di Maart caminda Roxanne Croes a bishita Scol Preparatorio Nos Paraiso. Aki alumnonan di di e scol a ricibi tayer di arte y artesania, unda a siña con pa traha nos bandera uzando nan creatividad.
Meta di e tayernan di Aruba Bank ta pa promove aspectonan di musica, arte y cushina tipico di Aruba na un manera creativo entre muchanan di scol preparatorio y scol basico.
Aruba Bank ta orguyoso di por a contribui cu tayernan educativo en conexion cu e celebracion nacional mas grandi di Aruba y ta desea comunidad di Aruba un feliz dia di Himno y Bandera.