Un homber aparentemente ta papia spaño, a saca un revolver y a atraca e bendedora, kende a spanta asina hopi cu ela entrega e atracador full e placa di benta.
Rudolph Arendsstraat, Oranjestad: Diamars algo pasa di 7’or di anochi ta tuma lugar un atraco arma riba un bendedora di Lotteria na Get Rich Lottery den Rudolf Arendsstraat. E lugar di Lotteria ta keda net banda di e supermercado Three Colours Supermarket, otro banda di Topcar.
Un dama tawata bendiendo catochi y lotto den e lugar na momento cu un homber color cla, cabey un poco largo, bisti cu un T-shirt preto, cu un bermuda short y slof na pia, ta drenta den e lugar di bende lotteria y ta pidi e bendedora pa cambia cent pe, segun e bendedora e homber tawata papia spaño.
E homber lo a sali pafo y dje ela bolbe drenta bek den e lugar di number y e biaha aki cu un revolver den su man, exigiendo e bendedora pa placa. E bendedora a spanta asina hopi y a entrega e atracador full su benta, e homber lo a bandona e sitio na pia y aparentemente lo a bay direccion di Edisonstraat.
Mesora a avisa polis y na yegada polis a cuminsa papia cu e personanan cu tabata eybanda y a cuminsa cu un buskeda den Companashi. Tambe e agentenan a bay na e Supermercado pa mira e imagennan cu nan camara di seguridadnan lo por a capta di e atracador.
Presencia di Atraco Team y tambe Slachtofferhulp a wordo pidi na e sitio, mientrastanto polisnan tin e area cera y ta buskando e atracador.
Cuanto placa e atracador a logra bay cune, no ta conoci ainda pero si tawata un anochi cu un bon benta, pa motibo cu e premio di Lotto halto.