Desde cu Minister Otmar Oduber a asumi e responsabilidad di e Ministerio encarga cu FCCA den Gabinete Wever – Croes, Minister Otmar Oduber a reuni cu FCCA pa por resolve diferencianan cu tabatin den pasado. E relacion cu tabatin entre Gobierno cu FCCA e tempo ey tabata uno deplorabel y durante di 8 aña no a traha cas social na Aruba. Consecuentemente a cera un MOU sigui pa un convenant, pa cual aworaki ta cosechando e frutanan di esaki. E prome 36 apartamentonan di e total di 42 apartamentonan na e localidad na Savaneta a wordo entrega. Esaki ta parti di e 176 casnan cu a inicia cu nan construccion aña pasa. E aña aki tin casi 220 cas adicional cu ta bin acerca, asina poco poco ta haci apertura di e diferente barionan crea door di FCCA.
Minister Oduber a splica cu algo cu a pone accento riba dje ta e aspecto di ‘leefbaarheid’, pa e calidad di bida di esnan cu ta biba den e bario ta uno unda cu bisiñanan ta bon cu otro y convivi cu otro. Tambe cu e casnan ta di un nivel cu ta eleva calidad di bida y cu habitantenan tin un sitio pa recrea.
Proyectonan andando
Aki dos siman lo tin apertura di e proyecto di casnan social na Cunucu Abou. Pero mester menciona cu tin proyectonan andando na tur parti rond Aruba. Na Kiviti, San Nicolas, Tanki Leendert, Paradera, Santa Crus entre otro. Di e forma aki mustrando e compromiso cu a pone dilanti pa cumpli cu e construccion di 200 cas pa aña! Esaki ta compromiso di Gabinete Wever – Croes. Minister Oduber a informa cu casnan cu antes tabata sali entre 2100 – 2200 florin pa meter cuadra pa construi, aworaki tin convenant unda cu nan no mag di costa mas cu 1600 florin. FCCA ta informa cu casnan cu awor ta bay wordo construi na Kiviti ta bou di 1600 florin. Cual ta ilustra unda cu tin boluntad ta logra.
Minister Oduber ta gradici FCCA fuertemente y ta felicita cada persona cu a ricibi un vivienda pasobra ta nan lo converti e cas den un hogar pa nan mes!.