Home » Partido MEP: Segun Mike Eman: PAUL CROES A STROBA PARTIDO AVP PA SIGUI HACI CAMPAÑA ELECTORAL NA MANERA DESHONESTO

Partido MEP: Segun Mike Eman: PAUL CROES A STROBA PARTIDO AVP PA SIGUI HACI CAMPAÑA ELECTORAL NA MANERA DESHONESTO

by Admin
0 comment 47 views

 

 

Mike Eman, despues di e veredicto di Paul Croes na unda cu hues a declara Paul Croes culpabel di corupcion, a admiti publicamente cu e forma cu su partido AVP a hiba su campañanan electoral, no por continua. Pa e motibo aki e lider di AVP, kende a defrauda su 8 mil votadonan door di bay cera su curpa y no representa nan den Parlamento, awo kier reuni cu nan urgentemente pa asina nan busca e manera pa hiba un campaña electoral diferente. Cual ta algo hopi dificil y por bisa te hasta imposibel pa e partido berde pasobra semper nan a hiba campañanan electoral miyonario.

 

Loke cu Mike Eman mester na prome luga ta pidi nos pueblo disculpa pa e ofensa grandi y e berguensa cu e y su ministernan ta pone Aruba pasa aden. Y na di dos luga, Mike Eman tambe mester entrega su mes na investigacion pa cu e caso di Paul Croes. Prome como lider kende tawata sa loke Paul Croes tawata haciendo y tambe pa a permiti e berguensa aki pasa den su partido.

 

Mike Eman tawata na altura di loke cu su minister Paul Croes tawata haciendo. Mas ainda, secretaria di Conseho di Minister di AVP, Nicole Hoevertsz tambe tawata sa di e ‘Toko’ di Paul Croes sinembargo niun di dos a haci denuncia contra Paul Croes pero a laga nan minister continua den su actonan ilegal.

 

Segun nos Codigo Penal, tur hende cu tin conocimento di un caso penal ta obliga pa haci denuncia. Mirando contenido di e procesverbaal den e caso di Paul Croes cu na 2015, na 2 ocasion secretaria di Conseho di Minister Nicole Hoevertzs a declara cu e a papia cu Paul riba e negoshi di tur e “ontheffingen”. Como hefe di Nicole Hoevertzs, Mike Eman mes lo mester a manda Nicole Hoevertzs pa hala Paul Croes, kende tambe ta hefe di Nicolo Hoevertzs, na su orea y e ex minister cu tur consecuencia no a haci caso y awo e berguensa ta cay riba nos pueblo.

 

Aki claramente por realisa un biaha mas e falta di liderazgo di Mike Eman. Si tabata tin algo pa “reclama”, ta e como Minister President, cu mester cuida integridad di su ministernan, mester a haci e trabou sushi aki y no manda un ambtenaar haci su trabou p’e. Mike Eman, cu su falta di liderazgo, a pone e mes hunto cu Nicole Hoevertzs como culpabel y awo e pregunta ta keda ki dia ta cuminsa investiga Mike Eman y Nicole Hoevertzs segun nos Codigo Penal?

 

Un invistigacion lo “incrimina” Mike Eman den e caso “IBIS”, pasobra ya for di 2015 e tabata sa di e negoshi cu permisonan di Paul. Pasobra Mike Eman tawata sa di e negoshi aki y no a duna aangifte, loke pa ley e ta obliga pa haci.

 

Mirando awor e declaracion di Mike Eman cu caso IBIS lo stroba politiconan di AVP di haci fundraising, ta implica cu Mike ta “sostene” e echonan di Paul Croes, unda e ta bisa hasta cu e ta preocupa con lo bay haci un campaña sin placa of un campaña chikito y honesto manera tur otro partido politico ta haci. Mike Eman awo ta acusa Paul Croes di a strob’e di hiba un campaña deshonesto y ta man na cabes y yamando su votadonan pa duna auxilio.

 

Mirando con Mike Eman, cu su declaracion a “incrimina” su mes, no ta husto cu e ta colga Paul so, mientras e tabata sa for di 2015 caba loke su minister tawata haciendo. Mike Eman ta sigui defende e manera di colecta placa aki pa campaña electoral. Esaki claramente ta indica cu Mike Eman tambe ta aden. Ta imperativo un investigacion di e rol di Mike Eman como Minister President y lider di AVP. Mike “je stond erbij en keek ernaar”, acaso bo mester a sacrifica Paul pasobra su fam ta Croes? 

 

 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio