Home International Bayena pa ekibocacion ta guli un buceado y hopi lihe ta scupi...

Bayena pa ekibocacion ta guli un buceado y hopi lihe ta scupi e buceado afo

Un buceado cu ta custuma bucea banda di diferente Mamifero pa saca nan potret y tambe ta hiba turista bucea banda di cierto mamiferonan, durante un buceo di golpi e ta cuminsa sinti un pression basta fuerte na su heup y ta haye den un scuridad y hopi lihe ela bin compronde cu e ta den boca di un bayena. 

Port Elizabeth,  Sur Africa: Rainer Schimpf, un buceado di 51 aña, manera custumber riba un mainta a dicidi di sali pa bay bucea cu algun turista. E tempo tabata mustra bon y e lama tabata calmo, un bon dia pa nan bay saca potret y filma diferente mamifero cu ta circula den un area caminda nan ta custuma bay bucea.

Esaki tabata un 62 miya for di costa di Port Elizabeth, tur cos a cuminsa masha bon, te ora cu Rainer di golpi a sinti un pression fuerte na su heup y a bira scur, mesora ela bin compronde cu e ta den boca di un bayena. Segun Schimpf e no tabata tin tempo pa spanta y ni pa perde cabes, mesora ela cuminsa pensa con pa sali for di boca di e bayena aki, esaki no a dura largo.

Un rato despues ela sinti cu e pression na su heup a kita y di golpi e bayena a scupi Schimpf bek den lama.

Schimpf afortunadamente no tabata herida y por a landa bay bek na su boto. Na momento cu ela yega abordo prome cos cu ela puntra e otro buceadonan abordo si nan a saca suficiente potret, cual sigur nan a haci y a filme tambe.

Segun e testigonan abordo kemen cu esaki ta un experiencia cu hamas nan lo por lubida. Pa Schimpf tambe e ta un experiencia, pero ela bisa bon cla cu e ta spera cu nunca mas e drenta den boca di bayen.a

Bayena no ta come hende, loke a pasa cu Schimpf tabata un ekibocacion di e bayena, pesey mes ela scupi Schimpf hopi liher bek afo. E bayena su grandura sigur ta spanta hende y cu su finsnan patras e por dal un hende y desgraci’e.