ORANJESTAD, Aruba – Departamento di Salud Publico ta sigui vigila e situacion di malesanan infeccioso den nos region unda Vanezuela y Brazil ta entre e paisnan cu mas caso registra.
Recientemente servicio di malesanan infeccioso di Departamento di Salud Publico a invita Dr Karen Lewis-Bell sub-regional advisor, immunization di PAHO pa provee nos cu informacion riba prevencion y tambe ayudo den controla y mehora nos sistema di vigilancia y registracion di malesanan infeccioso, manera por ehempel Measles, Mazelen y Sarampi Aleman.
Durante su bishita di 3 dia, Dr Karen Lewis-Bell riba su prome dos dianan a dedica na hasi un evaluacion di e situacion di e programa di vacunacion na Aruba. Tambe e la duna un presentacion na dokternanan di cas tocante e menasa di un brote di malesanan infeccioso cu atencion principlamente riba Sarampi Aleman, Rubella, Rubella Congenital y e importancia di señala, diagnositica y raporta esakinan.
Por ultimo a ehecuta un “measles outbreak training” cu empleadonan den salud di Departamento di Salud Publico y Wit Gele Kruis. E training ta di sumo importancia mirando con Sarampi Aleman (Mazelen) ta hasiendo su entrada bek den cierto regionnan y paisnan cu pa añanan no a mira casonan di Sarampi Aleman. E motibo di esaki ta e campañanan anti-vacuna cu ta causando cu babynan y muchanan ta keda contagia y ta causando brote caminda tin hasta casonan fatal.
Den Caribe y Latino America a presenta casonan recientemente importa di Europa. Merca ta conociendo un brote basta grandi e ultimo simannan. Venezuela y Brazil tambe tin brotenan actualmente. Aruba cu ta un isla turistico no por evita cu un caso di Mazelen por drenta, pero si nos ta prepara nos profesionalnan pa atende y reconoce e malesa mas liher posibel y asina evita brotenan innecesario. E bon di e malesa aki ta cu ta existi un vacuna cu ta duna proteccion di 99% despues cu ricibi e di dos vacuna pa bida largo. Tur esakinan a wordo discuti y atendi pa por actua den caso cu Aruba wordo confronta cu un caso sospechoso y/of confirma.