Carib Wave 2019 lo tuma lugar dia 14 di maart pa 10’or di mainta y lo caba pa 3’or di atardi. e aña aki un biaha mas tur e first respondersnan, e dienstennan di Gobierno y tambe hotelnan a registra pa participa na e Tsunami Training.
Con Aruba ta bay participa na Carib Wave 2019
Den e ultimo 4 añanan, Aruba ta participa na e Tsunami Exercise pa asina cumpli cu e exigencianan di e region, pa mira con bon Aruba ta prepara pa un Tsunami.
Durante e training Sr. Lothar Irausquin di Meteo Aruba, lo ta e persona encarga pa informa e pueblo, tambe a pidi prensa local pa participa hunto cu Land Aruba, mescos cu e 3 añanan anterior, cu nan ta bin ta haciendo, paso por tin e mihor plan y un bon sistema di manda mensahe, pero si prensa no informa pueblo, niun hende no lo ta na altura cu tin un Tsunami training ta tumando lugar.
E senario di dia 14 di maart lo ta lo siguiente; lo sosode un teremoto panort di Panama di un magnitud di 8.5, esaki lo tuma lugar pa 10’or di mainta.
E prome mensahenan di Pacific Tsunami Warning Center lo drenta na meteo, via fax, email etc.. Meteo di Aruba mesora lo mester prepara un boletin pa prensa, pa tur diensten y instancianan cu ta participando na e training aki.
E senario di 14 maart, teremoto di un magnitud di 8.5 lo dal panort di Panama
Riba e website di Carib wave, tin basta informacion y tin tambe e excersize manual, cu ta describi e teremoto, e timeline y e haltura di e olanan, pa e training aki tabata tin mas cu un senario cu Aruba por a escohe for di dje, por ehempel Kick’em jenny, pero Aruba e aña aki a escohe pa Panama, un teremoto di un magnitud 8.5, cu su epicenter ta panort di Panama. E prome ola di Tsunami lo yega Aruba 1 ora y 48 minuut despues cu e teremoto a dal, via e canalnan oficial meteo lo wordo informa cu tin un teremoto y cu e tsunami ta na caminda. Meteo na su turno mesora lo mester procesa e informacion y traha un boletin, esaki lo wordo mande pa prensa pa notifica pueblo y tambe pa e instancianan concerni, cu lo mester bin mesora hunto y coordina tur loke mester wordo haci.
Olanan di 3 meter halto lo por spera na Aruba
Den e training aki Aruba lo por spera olanan di 1 pa 3 meter, full rond di Aruba y pesey lo pidi pa evacua tur hende cu ta biba cerca di costa. Pa 11’or y 48, e prome olanan di e Tsunami lo yega Aruba, prome cu esaki lo mester evacua e costanan.
Prensa mester informa pueblo di e training, pa Aruba ta mihor prepara pa un Tsunami
A pidi prensa pa informa e pueblo cu dia 14 di maart ta trata di un Tsunami training y asina evita cu pueblo bay den panico. Esnan cu ta interesa lo por inscribi pa participa den e Tsunami training aki.
Durante e training e hotel area lo wordo afecta y cu olanan di 3 meter halto lo manda waf y WEB bou awa.
E trainingnan aki ta importante, paso poco poco polis y brandweer por ahusta nan draaiboek y ta mihor prepara pa enfrenta un situacion real di Tsunami.
Aruba ta basta bon prepara pero ainda falta
Segun Lothar Irausquin di Meteo, Aruba ta basta bon prepara, pero si tin espacio pa mehoracion, un ehempel cu ela duna ta e sirenanan bandi lama, rutanan special pa yega na e safety zone.
Sirenanan pa alerta pueblo di un tsunami na caminda, lo por yuda pa scapa hopi bida
Sirenanan pa alerta pueblo cu tin un tsunami na caminda ta hopi importante, pero ainda Aruba no ta cla of no tin fondo pa instala e sirenanan aki, nan ta hopi costoso. Aruba no tin su Tsunami Ready Certificate. Aruba ta druk bezig pa logra haya esaki. Aparentemente un isla mester cumpli cu algun rekisto pa haya e certificado aki.
E Sirenanan por ta algo hopi costoso, pero sigur lo yuda salba hopi bida, si mira atras, den e training anterior a haci e alerta pa Tsunami via message, pero esaki no a bay bon y a keda pega.
E training di Panama ta duna Polis casi dos ora chens pa evacua personanan for di costa y avisa e pueblo, pero den un senario di un teremoto di e magnitud di 8.5 cu a dal na Venezulea, Esnan na Aruba no lo haya ni chens di evacua, e timeframe ta mucho cortico, den algun minuut e olanan di Tsunami lo yega Aruba y hopi hende lo por perde nan bida.
Ideal lo ta si Aruba tabata tin e sirenanan instala cu ta alerta e pueblo ora un Tsunami ta na caminda, esaki lo yuda scapa hopi bida, especialmente di esnan cu ta biba cerca di costa, por dunanan chens di hopi liher sali bay mas memey di nos isla, tame pa e area di hotelnan, cu si nan scucha e sirena pa nan personal y guestnan subi na e pisonan di mas halto di e hotel. Japon tin sirena di Tsunami Alert.
WEB bou awa, no lo bay tin suministro ni di awa y ni di coriente
Den caso di un Tsunami WEB lo bay full bou awa y no lo ta bay tin suministro ni di coriente y ni di awa, e tankinan di WEB rond Aruba lo tin reserva pa algun dia, pero lo mester pone cierto restricionnan. Tambe den caso di un Tsunami e mariniersnan lo mester yuda parti botter di awa di cas pa cas.
Den caso cu si na Venezuela y mas cerca na Falcon dal un teremoto di 8.5, Aruba mesora lo sinti’e y no tin chens ni pa evacua esnan cerca di costa, pero si tin un sirena e pueblo mes sa di biaha cu nan mester trata na yega mas memey di e isla, no mester warda riba meteo pa manda un boletin of un mensahe, time frame ta mucho cortico. Tanten cu no tin sirena lo manda un boletin y Rampenburo hunto cu Brandweer cu ta na cabes di e crisisteam lo sigui nan draaiboek despues di haya e boletin.
Polis lo evacua e beachnan y lo pasa cas pa cas pa informa y evacua
Dia 14 di maart durante e training polis lo hasi e parti di evacua e beachnan, den e training aki tin 1 ora y 48 minuut pa actua, polis lo pasa cas pa cas pa informa y evacua e habitantenan, via speakerphone lo por pasa duna informacion den e barionan.
Aruba ainda no ta Tsunami Ready, trahando duro pa yega eynan
Pa Aruba bira Tsunami Ready falta algun cos ainda, e borchinan cu mester bin, y kizas nos lo mester haya e sirena di Tsunami alert. Durante e training anterior a purba via e sistema di message, pero ela tarda, por bisa cu e no ta funciona.
Polis tin suficiente personal y vehiculo pa traha
Aruba ta hopi limita y no tin fondonan suficiente pa pone esaki funciona optimal, pero ta trata na traha cu loke por y cu loke ta na nan alcanse, segun nos a compronde cu den un caso di Tsunami, Polis actualmente tin suficiente vehiculo y personal pa haci e trabou di evacuacion si mester. WEB tin reserva den tanki pero lo mester pone restriction, pueblo no mester bay abusa di e awa, use pa cosnan cu no ta necesario. Hospital si lo keda hopi tempo for di servicio.