Avion di e aerolinea mas grandi di Afrika, cu ta Ethiopean Airlines ta cay y tur 157 persona a bordo ta perde nan bida, ta trata di 8 cabincrew y 149 pasahero, di 33 diferente nacionalidad, entre nan tabata tin chines, Frances, Ingles, Canades, Belgo etc. y tambe 5 persona di nacionalidad hulandes.
Mayoria di e pasaheronan abordo tabata bayendo pa un conferencia di United Nations, tocante Medio Ambiente, cu lo mester a cuminsa dialuna mainta, 4 pasahero tabata viahando cu paspoort di United Nations.
Addis Abeba: Diadomingo 8’or y 38 di mainta ora local, na e Aeropuerto Internacional di Addis Abeba, Bole International Airport, e boeing 737 di Ethiopian Airlines, ET 302 ta lanta vuelo cu destinacion Nairobi, capital di Kenia, abordo tabata tin 157 persona di 33 diferente nacionalidad.
Seis minuut despues di a lanta vuelo, e piloto ta bati alarma avisando cu e avion ta confrontando problema y cu e lo kier bira bin bek, pero pa un of otro motibo no ta logra y ta cay, un 62 kilometer zuidoost di capital di Ethiopia, cerca di e cuidad di Bishofte.
Segun e aerolinea, e avion tabata den bon estado y e piloto tin un record excellente, te na e momento nan aki no ta conoci kiko por tabata e motibo cu e avion aki a cai.