Parlamentario Endy Croes a baha pisa riba Mike Eman durante su conferencia di prensa ultimo. Endy Croes a amplia riba un conferencia di prensa di Mike Eman dia 26 di februari ultimo unda Mike Eman a gaña y manipula un cantidad di biaha. Awe lo trata e parti di edad di pensioen. Mike Eman a insinua cu MEP a drenta cas di pueblo gañando pueblo cu MEP lo baha e edad di pensioen na 60 aña. Mike a ripiti esaki 3 biaha den su discurso. Aki nos a bolbe gara Mike ta gaña.
Parlamentario Croes a splica cu el a pone man riba programa di MEP 2017-2021 “Nos Vision ta e Solucion” y riba pagina 34 nos colega Karel Jeandor a presenta e solucion unda MEP a priminti di baha e edad di pensioen na 62 aña y nunca a papia di 60 aña manera Mike Eman ta gaña atrobe. Es mas a splica cu por tin un flexibilidad pa esnan cu kier baha te cu 65 aña. Adhunto copia di esaki.
Mientras netamente Mike Eman y AVP den nan programa cu nan a drenta bo cas a manipula gañando bo cu AVP si lo concentra pa mantene edad di pensioen na 60 aña (mira adhunto e prueba). Parlamentario Endy Croes ta bisa Mike Eman pa e bay gaña baca!! Riba pagina 20 di e programa di AVP a presenta e plan pa pensioen cu AVP lo mantene edad di pensioen na 60 aña!!
Awe e propio Mike Eman cu a crea un Mega Debe y ta causante di e desaster financiero sin cu ainda papia di e tantisimo corupcionnan cu a tuma lugar den 8 aña di AVP tin e curashi di continua cu su engañonan. Manera nos a bin ta splica ki ora cu Mike Eman di AVP papia un disparate nos lo ta para cla pa corigie y trece e berdad pa pueblo.
Ken por lubida con Mike Eman a tuma Marcelino y un gran cantidad di votador haci momento el a priminti tur cu e lo “elimina” BBO? Wel Mike Eman a haya un BBO na 3% (2009) y a entrega esaki na november 2017 na 3.5%. Pues hustamente Mike Eman a aumenta BBO e tempo aya. Mike Eman y AVP nunca pero nunca mas por ta apto di confiansa di pueblo pasobra nan a demostra di ta abusador y probechador rondona pa un “clan” corupto.
