ORANJESTAD – Ministerio di Salubridad Publico y Deporte, conhuntamente cu IBiSA ta anuncia e proyecto: “Hoben Activo, Hoben Feliz” lo continua. Meta di e programa aki ta pa motiva y promove hobennan pa hiba un bida activo y saludabel door di involucra e hobennan cu actividadnan deportivo caminda nan abilidadnan social y emocional ta wordo mehora y caminda tambe e balornan humano mas importante ta wordo estableci.
Den e ultimo añanan problemanan social aki na Aruba a aumenta. A constata cu no tin hopi actividadnan di movemento despues di scol pa muchanan. Pa es motibo a cuminsa cu e proyecto “Hoben Activo, Hoben Feliz” pa yuda soluciona y/of reduci e cantidad di problemanan social serca e muchanan. Pa e lunanan di maart y april e muchanan lo bai tin e oportunidad di practica e deportenan di boxeo, fencing y capoeira y di e manera aki gobierno ta promove actividadnan fisico. Na momento cu un mucha ta sintie comodo pa por haci sport y ta activo nan lo por tin chens di sigui busca pa conecta cu otronan na por ehempel un Centro di Bario of un veld den bario y stimula otro pa hiba un bida activo y saludabel.
E programa Hoben Activo, Hoben Feliz lo ta 3 biaha pa siman y lo continua diaranson 6 di maart 2019 na Sport Centrum San Nicolas. Muchanan entre 9 pa 12 aña por pasa libremente pa registracion cual ta completamente gratis na Sport Centrum San Nicolas. E programa lo cuminsa 3’or di atardi y lo termina 5’or y lo tuma lugar riba tur dialuna, diaranson y diabierna.
Minister Dangui Oduber ta sumamente contento y satisfecho cu e proyecto aki y un bes mas ta demostra cu e gobierno aki ta pone e ser humano central caminda por medio di deporte ta aporta na reduci future gastonan di AZV y tambe problemanan social. Esaki ta un proyecto deportivo pa hobennan cu Minister Dangui Oduber ta realisa cu meta pa muchanan den bario topa otro na un forma sano dor di practica deporte. Minister Dangui Oduber su meta ta pa e proyecto aki logra yega den tur bario. A la vez Minister Dangui Oduber ta invita e muchanan di San Nicolas pa bin participa na a programa aki y disfruta di diferente weganan sano.