ORANJESTAD, Aruba – Aruba Hotel & Tourism Association (AHATA) a organisa 2 tayer pa su miembronan den Alhambra Ballroom pa educa mas persona cu ta traha den sector turistico tocante e turista Vegan. E segmento di estilo di bida Vegan ta creciendo y ta importante pa Aruba keda competitivo den e mercado.
E miembronan di AHATA a mustra hopi interes pa e topico presenta pa e fundador di Vegan Aruba, Meredith Marin. E prome tayer tabata destina pa personanan cu ta participa directamente den e determinacion di menu y strategia di restaurant, pa conoce e expectativanan di dieta vegan y cua producto y ingrediente ta disponibel pa receta creativo y balansa.
E di dos tayer tabata pa tur esunnan den e industria turismo cu ta den contacto directo cu huespednan. Durante e tayer a delinea e rasonnan cu hende ta scoge di ta Vegan y e lista di restaurant na Aruba cu tin menu special.
AHATA ta reconoce cu e popularidad di bida Vegan lo sigui crece y cu Aruba Tourism Authority tin strategia di mercadeo pa e niche. Pa tal motibo tabata hopi positivo pa mira e interes di parti di AHATA su miembronan pa e topico y pa sigui desaroya oferta Vegan na Aruba.
