E temporada di gran celebracion di Carnaval ta tras di lomba y ta yega momento pa reflexiona y recapacita, specialmente si lesa e relatonan di polis den e medionan di comunicacion. Segun Parlamentario Sue-Ann Ras: “Realidad ta keda, cu e iresponsabilidad di parti di nos propio hendenan, cu ta dicidi di bebe alcohol y no tin control di nan limite, unda por tin consecuencia fatal, ta keda un asunto alarmante!” Ban spera cu e temporada aki di Cuaresma realmente haya su nificacion y cu nos hendenan cuminsa reflexiona riba nan comportacion y con nan por mehora esaki pa nan mes y pa otro.
DETENCION
“Cu detencion di hende durante varios di e paradanan a baha considerablemente, ta un bon comienso, pero esaki ainda ta preocupante, mirando cu edad di e detenidonan ta keda uno relativamente hoben,” segun Ras. Cu e bahamento aki ta nifica cu nos hendenan cu ta bay wak parada, por lo menos tabata poco mas consciente di nan comportacion y ki consecuencia esaki por tin, si acaso nan comportacion ta socialmente inaceptabel door di surpasa nan limite di uzo di alcohol of otro substancia ilegal. Pero ainda ta preocupante, con polis mester haci uzo di su autoridad, pa evita un escalacion di situacion y mester a detene varios hende, door di nan comportacion violento y peligroso.
ABUSO DI MUCHA
“Mi sa cu esaki ta un topico cu tin hopi sentimento y opinion. Pero mi no por keda sin menciona si, cu hopi biaha nos ta cla pa apunta otro, cu no ta haciendo e trabounan necesario, pa yega na solucion di castigo mas severo pa e abusadornan. Sinembargo ta di lamenta, cu durante e eventonan di Carnaval, por a nota claramente varios mucha y baby den un situacion sigur no adecuado: solo, biento di anochi, desordo, calor, incomodidad y tin caso hasta pio, unda tin violencia y abuso di alcohol. Y sin papia di e forma cu algun mayor ta opta pa bisti nos mucha muhernan”, Ras a cuminsa na bisa. E responsabilidad primordial ta keda di mayor y nan mester ta consciente di e escogencianan cu nan ta haci y den ki situacion nan mes ta exponiendo nan yiunan. “Cu mester bin cu castigo mas severo tambe ta di compronde y apoya. Pero no por descarta cu na Aruba tin castigo cu ta inicia na minimo 4 aña y tin un maximo te 12 aña. Pa aclarea y enfatisa, niun castigo ta suficiente pa un caso di abuso di mucha, pero ta di lamenta cu pa hopi aña, no a traha riba mehoracion di e procesonan, pa yega na haya un abusador culpabel. Nos no mester lubida cu ni sikiera un colposcoop tin, pa saca potret di e victimanan cu por uza den corte, como tambe e traduccionnan di rapport, cu ta keda un punto di atencion urgente cu mester mehora, mescos cu e tempo cu ta pasa, prome cu un victima indica kico a pasa cu ne. Tur esaki y algun detaye mas ta loke ta impedi pa un huez yega na e pruebanan real pa sentencia un abusador, di cual den hopi caso, tambe tabata un victima di abuso”, Ras a enfatisa.
CORE BOU DI INFLUENCIA
“Tin biaha mi ta puntra mi mes, kico mas mester pasa, cuanto victima mas mester tin, pa nos hendenan realisa e daño y dolor inmenso cu coremento bou di influencia por causa,” Ras a sigui bisa. Durante control di e paradanan, riba di mil chauffeur mester a supla door di e alcosensor, pa controla si nan ta surpasa e limite di alcohol permiti di 220 ug/l. Alrededor di 40 chauffeur a surpasa esaki y tabatin caso hasta unda a haya chauffeur cu mas di 500 ug/l, sin kita afor, cu tabatin chauffeur cu no por a ni supla mes of para riba nan pia drechi. “Lamentablemente Aruba a conoce hopi caso doloroso tocante core bou di influencia di alcohol y su consecuencianan y aparentemente ainda nos ta haya rond di 40 chauffeur iresponsabel y inconsciente, di kico ta e consecuencianan y ki dolor y tragedia e acto aki por causa henter un famia” Ras a finalisa bisando.