Manera ta custumber, Aruba ta presente na e conferencia ITB Berlin – e conferencia internacional di mas grandi den coneccion cu biahe y turismo. Pa 2019, Aruba su recepcion di custumber na su booth, cu e “hashtag” #ONEHAPPYHOURCOCKTAIL, tabata uno extra special. Esaki ta pasobra a commemora e hecho cu A.T.A. ta promoviendo Aruba den e mercado Europeo pa 35 aña y cu Sr. Ewald Biemans, fundador di Bucuti & Tara Beach Resort, a sigur forma un parti esencial di e trajectoria aki cu su presencia na ITB pa e di 39 biaha e aña aki.
Aruba su commemoracion di 35 aña den e mercado Europeo, cu promocion y esfuersonan pa medio di A.T.A., a inicia na ITB Diaranson ultimo. Lo tuma oportunidad den 2019 pa enfatisa e importancia di Europa pa Aruba pa medio di e campaña promocional aki, unda lo entre otro duna atencion na varios pionero y persona cu a hunga un papel clave pa cu Aruba su turismo na Europa durante añanan. Pero tambe lo trece dilanti e evolucion di Aruba su producto turistico y su promocion, cu activacionnan ambos bou di socionan den e mercado y bou di e consumidor.
Importancia di diversifica Aruba su mercado
Ora ta papia di Europa y 35 aniversario, Sr. Biemans cu a asisti ITB pa di 39 biaha y ta un proponente clave pa cu e importancia di e mercado aki, ta sin duda algun un pionero pa cu e mercado Europeo. Sr. Biemans a yega nos isla mas o menos 50 aña pasa cu un vision cu awe sigur a sa di trece su fruto pa nos sector turistico. E tempo ey caba Sr. Biemans tabata bon na altura cu entre otro turismo ta Aruba su pilar di mas grandi di entrada, y cu Europa ta representa oportunidadnan grandi pa Aruba, reconociendo e importancia di diversifica Aruba su mercadonan. Tambe Sr. Biemans su vision a y ta sigui consisti di enfatisa cu si destrui naturalesa, nos turismo tambe ta wordo destrui. Un visionario cu sigur a sa di yuda eleva nos producto turistico na Aruba, y ta sirbi como ehempel pa efsuersonan riba area di un maneho y desaroyo duradero mundialmente.
Durante di e recepcion special diaranson 6 di maart, Ronella Tijn Asjoe-Croes, CEO y Tirso Tromp, Director di Europa, di Aruba Tourism Authority a reconoce Sr. Biemans pa su esfuersonan pionero pa cu e mercado Europeo. Meymey di diferente partners y media Europeo a para keto na e hecho aki y tambe a refleha riba 35 aña di Aruba Tourism Authority na Europa. Bucuti & Tara Beach Resort a yega di ricibi aproximadamente 45 premio desde aña 2009 enfocando ariba romance, sostenebilidad, “Eco Certifications & Guest Experience”. Sr. Biemans tin un trayectorio largo di experiencia den locual ta turismo sostenibel. Algun di e premionan ricibi den transcurso di e añanan ta entre otro: Green Globe Platinum, como tambe Travelife Gold Certification. Na 2014 Sr. Biemans a wordo premia como hotelero di aña pa Carribbean Travel Awards. Tambe na 2016 a wordo reconoci cu un Gold Adrian Award, manera lider den turismo sostenibel cual ta wordo presenta pa Hospitality Sales & Marketing Association International (HSMAI) y National Geographic Traveler y recientemente na 2017 a wordo reconoci pa Caribbean Journal como hotelero di aña.
Tin di menciona cu den luna di April Sr. Biemans lo ta na Sevilla- Spaña pa representa Bucuti & Tara Beach Resort como un di e finalistanan pa cu e “Global Tourism for Tomorrow Awards”.
Nos por corda tambe na 2015 unda cu sr. Biemans a haya un caya na su nomber, dilanti di su hotel, honrando su trabao incansabel pa medio ambiente y turismo. Esaki ta e tipo di lidernan cu A.T.A. ta admira y sigui nan ehempel pa un bienestar productivo di nos producto turismo, como sigur primordialmente e bienestar di nos medio ambiente y henter e comunidad di Aruba. A.T.A. ta orguyoso di por conta cu liderazgo, sosten y participacion di Sr. Biemans pa locual ta trata desaroyo di turismo di Aruba, y di turismo di Europa pa Aruba. Pabien y Danki!