L.G Smith Boulevard – Diabierna anochi pasa di 8’or Kustwacht ta tuma contacto cu polis, pa avisanan cu nan a capta posiblemente un boto cu a yega tera y subi lama bek hopi lihe.
Sitio robes
Na prome instante manera informacion a drenta, varios patruya a bay cu urgencia entre ex Bushiri Hotel y e hanchi pariba di Casa del Mar.
Polisnan a baha y a cana na e beach, pero no a topa cu nada particular.
A topa cu turistanan y hendenan piscando, a puntra pero ningun hende a mira algo straño.
Mientrastanto hopi mas pariba, altura di Nikky Beach bin pabou eynan polisnan mester tawata y no na Bushiri. Fout grandi.
Autonan di polis a sali mesora pa e area di Nikky Beach.
Na West Deck, polis a wordo informa cu esnan cu ta biba ariba e zeilbootnan sa bin tera pa haci compras y despues ta sali bay bek na e boto, pues a pensa cu esaki Kustwacht lo por a capta.
Durante cu e polisnan tawata yegando e area posiblemente corecto, un persona a contanan cu tawata tin un v-car staciona cara pa lama. Y tawata tin un persona gritando algo na Spaño, direccion lama.
Pero, manera ela nota polisnan yegando cu zwaailicht e persona a subi auto y move mesora.
E sospecho tey cu ilegalnan por a drenta pabou di Pinchos, unda e homber tawata para ta grita na Spaño direccion lama.
KS a controla te cas di Gobernador, pero no a haya nada. Si a haya e sitio exacto 1 ora prome, lo por a topa cu e posibel boto di ilegalnan, cu Kustwacht a capta.
