Diahuebs Director di Impuesto sra Luenne Gomez-Pieters a ricibi e edicion di mas nobo di e “Fiscale Wetgeving 2019” for di man di Hans Ruiter, Tax Partner y Nicole Duyvelshoff, Senior Manager Tax di Grant Thornton Aruba.
Ya pa mas cu 10 aña e compania ta publica un resumen actual di e leynan di belasting cu ta aplicabel pa Aruba, e islanan BES, Curaçao y St. Maarten. E edicion aki ta e di 12 publicacion di e fiscale wettenbundel y e prome cu ta wordo publica bou di Grant Thornton.
Organisacionnan mester pasa door di nan asuntonan fiscal cuidadosamente pa asina gana e confiansa di e clientenan y keda cu bentaha riba e competencia. Riba nos mercado local hopi empresario, inversionista y negoshante tin lasonan cu e otro islanan den e region Caribense Hulandes. Cu tur e cambionan cu ta tuma lugar anualmente e ta keda un reto pa tin tur e leynan fiscal den un solo lugar. Cu publicacion di e fiscale wettenbundel, Grant Thornton ta yena e bashi aki. E Fiscale Wetgeving 2019 tin un balor agrega balioso pa amplia e conocimento di nos clientenan y comunidad en general.
Algun di e cambionan di mas importante e aña aki ta e Reforma Fiscal cu a keda introduci na Aruba, cu ta ensera cambionan den entre otro e sistema di grondbelasting y e tarifanan di inkomstenbelasting. Na Curaçao a introduci entre otro e Country Report di OECD pa companianan grandi, a adapta e regimennan fiscal preferencial segun e normanan internacional mas recien y tambe tabatin algun cambio den e successiebelasting. Ademas a agrega tambe cambionan chikito di tarifanan cu a tuma lugar riba nivel local di cada isla.
E edicion di e Fiscale Wetgeving 2019 ta obtenibel na tur oficina di Grant Thornton na Aruba, Bonaire, Curaçao y St Maarten. Pa mas informacion of pa pedido por yama +297 5221647. Ademas di esaki, e edicion pocket size aki lo ta obenibel pronto den un version digital tambe.