Oranjestad: Despues cu Presidente di Venezuela un biaha mas a cera frontera cu islanan ABC, basta Venezolano a keda pega riba nos isla y tambe algun personanan local a keda pega na Venezuela.
Aparentemente lo a haci excepcion den e caso aki y a laga algun buelo toch tuma lugar pa asina por transporta e Venezolanonan pega na Aruba, pa nan pais bek y e Arubianonan of esnan residencia na Aruba y ta pega na Venezuela por haya un chens di bin bek Aruba.
Diabierno ultimo esaki tabata e caso y Guarda Nos Costa cu tin un cantidad grandi di venezolanonan indocumenta deteni a probecha di a saca 27 persona di nacionalidad Venezolano y mandanan Venezuela bek.
Den dos van di Guarda Nos Costa a transporta e 27 persona nan indocumenta aki pa airport. Guarda Nos Costa a probecha di e oportunidad aki y e prome chens cu nan a haya a pone e 27 indocumentanan aki riba un avion rumbo Venezuela.
Ainda a keda un cantidad grandi di personanan indocumenta cu ta wardando riba nan deportacion. Mester bisa cu e cantidad di personanan indocumenta ta keda aumenta, autoridad ta trahando duro pa trata na combati e esaki.
E personal di Guarda Nos Costa ta man yen cu trabou, tur dia ta sali buska personanan indocumenta rond di nos isla. Guarda Nos Costa no tin solamente hendenan deteni, pero tambe tin cu atende cu esnan cu tin Meldplicht, wardando tambe riba nan deportacion.
Mientrastanto ileganan ta sigui drenta nos isla via lama, entre e 27 ilegalnan cu a wordo deporta, tabata tin ilegalnan cu a drenta via lama tambe y a wordo deteni. Tanten cu e situacion na Venezuela no stabilisa y drecha, Aruba lo keda cu e fenomeno di entrada di personanan ilegal via lama of cu no ta bay bek, ta sconde, of ta pidi asilo politico etc etc.
