ORANJESTAD – Diaranson atardi Minister di Turismo, Salubridad Publico y Deporte sr. Dangui Oduber hunto cu e Chairman di TPEF sr. Joe Najjar, miembro di board sr Curtis Fraser y David Britten di CVC Construction & Management tabata presente na Malmok dilanti di Ocean Z pa duna un inicio na e proyecto di “Boardwalk Malmok”. Como politico bo mester bisa loke bo ta haci y haci loke bo ta bisa. Nos a bisa for di campanja cu lo bin un boardwalk na Malmok pa garantiza e seguridad pa esnan cu ta haci ehercicio den e area aki.
E prome fase di e proyecto lo bay tin un duracion di 115 dia di trabou. E trabounan lo tuma luga di e crusada pa bay Arashi te cu dilanti di Malmok 747. E prome fase lo consisti di 240 meter di “hard hout” y lo haci uzo di klinkers tambe. Lo pone palo cu reflectors cu ta separa trafico di peatonnan y asina trece e seguridad na esnan cu ta haci uzo di e area aki pa cana of haci ehercicio. Tambe lo bin area di parkeo y loke nan ta yama e muraya di turtuga.
Desde inicio di gobernacion di Gabinete Wever-Croes 1, el a bira un prioridad riba lista di Minister Dangui Oduber, pa Aruba haya turista di calidad. Pa yega na e turistanan aki di calidad, mester duna e turista e producto cu e merece. Ademas di esaki, e mandatario ta combina hunto cu e cartera di turismo, esun di salubridad y di deporte pa crea un synergia den e vision pa un miho calidad di turisimo pa Aruba.
Minister Dangui Oduber a declara cu e proyecto aki ta uno necesario pa duna e area di Malmok un “upgrading” y trece seguridad na tur e personanan cu ta cana y haci ciclismo den e area aki.
Minister Oduber kier a gradici e board di TPEF, gradici Minister Oduber di infrastructura, DOW y sigur tambe Preserva Malmok pa nan cooperacion y input. E proyecto a bira un realidad cu hopi sugerencia treci dilanti door di Preserva Malmok cu a trece varios cambio dilanti cu a tene debido cuenta cu nan.
Esaki ta un otro promesa haci y un promesa cumpli.
