Declaracion di ex Prome Minister di Aruba Mike Eman ta un bofta den cara di pueblo. Un declaracion cu ta un muestra di tabata un lider debil, sin caracter unda cu awor kier bin bisa cu politiconan ta den un situacion vulnerabel. Y cu mester bin cu ley di control financiero di partidonan politico y politiconan
Hopi hilaridad
Di 2009 pa 2017, e partido cu mas a hiba un campaña miyonario sin ningun hustificacion financiero ta partido AVP. Unda cu candidatonan tabata haci fiesta tur fin di siman incluyendo sr. Mike Eman. Mi por recorda Mike Eman ora e cu su gang di mas di 75 hende tabata cana den barrio, a burla di mi pasobra mi tabata cana mi so ta bishita cas. Pero mi ta orguyoso pasobra mi consenshi ta trankil. Pueblo por corda tur e fiestanan cu tabata tin y awor pueblo por saca nan som di unda e placa y material tabatin bin. Y unda Mike Eman a keda pa para pa un campaña habri unda por duna muestra di unda e fondonan aki tabata bin? P’ami e mentor di tur e hobennan aki ta Mike Eman pasobra ta di un caminda nan a siña con pa move cosnan y esey ta bin di nan lider pa entre otro nos por corda con e tabata hunga cu verf cu e tabata haya.
Fiesta riba brug
E fiesta di cumpleaños di ex Promer Minister Mike Eman riba brug di Green Corridor ta muestra claro di mal uso di fondo di pueblo, unda cu Mike Eman a haci su fiesta di cumpleaños bao engaño cu ta e compania ta habri e brug pero na final e recibo a bin pa caha di Aruba y cada ciudadano. Y awo ta di ken e hobennan aki a siña di haci mal uso di fondonan di Gobierno? Mi ta spera ora nos atende cu esaki den jaarrekening 2017 parlamento den su totalidad para tras di esaki pa cobra e ex Minister Mike Eman e placa aki pasobra pueblo ora nan haci aña ta saca di nan mesun saco pa celebra nan cumpleaños y esaki ta totalmente inaceptabel
Ley di control financiero di partidonan politico
E ley aki ta existi di aña 1999 bao gobierno di AVP unda cu Henny Eman tabata e Promer Minister di Aruba y unda claramente no por a pase pasobra den nan gobernacion corupcion tabata na ordo di dia y nos ta corda caso SACE cu e mafiosonan Italiano. Di 2009 pa 2017 nunca ex Promer Minister Mike Eman no a ni mishi cu e tema pasobra su partido hamas por hustifica nan fondonan y sigur awe den caso di ex Minister Paul Croes pueblo por wak con ta yega na fondo pa hasta celebra Concierto di Speransa door di explota comerciantenan a cambio di fabornan y cu no tin fin di caba. Mike Eman a demostra di ta un lider para pa corupcion, mal uso di fondonan di pueblo, para pa crimen organisa na Aruba y unda hasta tabata sa cu su ex Minister cu tabata su pupilo a actua robes y a exigi parlamentarionan di AVP pa cambia e concepto di ley di screening/integridad minister pa por laga e ex Minister den funcion.
Pami e declaracion di Mike Eman ta un berguensa y sigur un falta di respet pa pueblo y un bon bofta. Awo cu a laga un pais financieramente y economicamente na werki , a laga nos pais internacionalmente na berguensa como un pais cu gobernantenan coruptivo y condena. Esaki ta motibo pakico ni con Santo Mike Eman y su partido AVP pretende di ta, ta un daño hopi grandi el a haci na imagen di nos pais. Un pregunta cu pueblo tin di haci Mike Eman ora topa cune: Con el a yega na su Penthouse y con e ta sobrebibi sin salario?
