Parlamentario Alan Howell, comentando riba e aumento di e suma pa loke ta e maaltijdbonnen (bonnan pa cumpra cuminda) a indica cu e ta sumamente contento cu e desaroyo aki.
El a indica cu e mes, formando parti di Cuerpo Policial pa 25 aña sa bon bon cu un overtime maaltijdbon di Awg.7,50 of Awg.12,50 di masha tempo no ta yega pa cumpra un cuminda drechi y mucho menos un co’i bebe cu ne.
“Haciendo uzo di mi derecho como Parlamentario, mi a haci den pasado peticion na minister di Husticia Andin Bikker pa aumenta e suma di e maaltijbonnen mirando cu for di aña 1993 e bonnan aki no a conoce un aumento. Mi ta gradici minister di Husticia pa duna oido na e peticion aki y trece cambio den e maaltijdbonnen pa KPA,Brandweer, Douane, KIA, Cuerpo Especial Arubano, Imigracion y GNC”, Alan Howell a indica. E bon chikito a bira Awg.15,- y grandi Awg.18,25.
Finalisando e parlamentario di POR a bisa cu awor lo keda en espera di e gevaren premie, cual ta un mocion cu a haya sosten den Parlamento pa por ofrece un premie na esnan cu ta pone nan bida na peliger den nan function diario.
