Parlamentario Endy Croes a bin ta bisa di no lo laga ningun engaño di AVP pasa y lo percura pa reacciona riba tur miembro di AVP sin distincion y sin miedo, semper cu e berdad. Diaranson ultimo a trata den un reunion publico den Parlamento di Aruba e desaroyonan di CAFT. Tanto Minister Presidente Evelyn Wever Croes y Xiomara Ruiz Maduro tabata den Parlamento pa duna un splicacion amplio unda tur Parlamentario por a hiba nan disertacion y haci nan preguntanan alcaso.
Ehempelnan di traidor
Sinembargo diabierna 22 di februari esta e fecha cu hustamente un sentencia lo mester cay den un caso grandi di corupcion di ex minister Paul Croes y su empleadonan den su oficina y tur sostenedornan di AVP, Richard Arends a publica un articulo alrespecto CAFT. Di acuerdo cu Richard Arends “Gobierno no ta cumpliendo cu CAFT y tampoco cu e protocol cu e mes a firma”. Conciudadanonan, ora bo papia di “TRAIDOR” anto Mike Eman y Richard Arends ta ehempelnan bibo di esaki. Ta cu ki curashi Richard Arends tin e pudor di bin tilda e gobierno aki di no ta cumpliendo cu CAFT y of e protocol.
Deficitnan astronomico
Na promer lugar ta bon pa Richard splica pueblo ta dicon y ta kende a permiti CAFT na Aruba? Como Arubiano Richard mester tin hopi pero hopi berguensa di a traiciona nos pueblo y e lucha di Betico entregando parti di nos autonomia esta parti di nos Status Aparte. Hustamente Richard Arends tabata consehero mayor di Mike Eman y AVP den henter e proceso aki. Richard por splica pueblo con e asunto di CAFT a cuminsa of mi mester record’e? Richard, splica pueblo di tur e deficitnan y e desgracia financiero cu AVP a causa pais Aruba cu awe nos tin CAFT? Wel di acuerdo cu rapport di Banco Central, defcit 2010 (-188.6 MIYON), 2011 (-325.2 MIYON), 2012 (-443.3 MIYON), 2013 (-332.8 MIYON), 2014 (-405.8 MIYON), aki e KB a bin y e storia di Mike Eman bebiendo ensure den un tent y alaves storia di CAFT y LAFT y e Protocol di 2 mei 2015 a haya bida. 2015 (-84.6 MIYON), 2016 (-177.3 MIYON) y 2017 (-130 MIYON). Esaki ta cifranan real y asina aki AVP, Mike Eman cu su consehero Richard Arends a goberna e país aki.
Cobra riba custia di pueblo
Awe Richard Arends kier papia di cumplimento? Pa informacion di Richard Arends, den 2018 Aruba a conoce un presupuesto BUDGET NEUTRAAL y pues a goberna den margen di ley y presupuesto y no a bay fin di aña pidi mas placa manera tabata e 8 añanan di AVP. Richard Arends mester conta pueblo con el a cobra 2 MIYON cu Horizon Consultancy for di Landskas pa conseha Mike Eman. Splica pueblo con bo a cobra 500 mil na RDA y otro suma di 574 mil na Utilities. Conta pueblo di e tereno cu bo a haya na Malmok unda awe bo tin un cas balora na 1 miyon florin ta biba aden. Si mi mester sigui, lagami sa. Parlamentario Endy Croes ta splica cu e weganan di “kikiboe” mester caba y pueblo mester conoce su Parlamentarionan di AVP kendenan tur a permiti e desaster cu nos ta bibando aden awe. Nunca pero nunca mas e hendenan aki no por bolbe na poder.
