Prome Minister Evelyn Wever-Croes, den un conferencia di prensa e siman aki, a duna di conoce cu Gobierno di Aruba ta dirigi tur esfuerso riba cumplimento di e contract di parti di Citgo. Gabinete Wever-Croes, tin e situacion di e refineria Citgo halto riba agenda desde e prome dia den gobernacion na unda cu di biaha Gobierno a indica cu e situacion di e Refineria no tawata bon. Esaki, segun Prome Minister a empeora.
Prome Minister ta indica cu na februari 2018, den un paar di luna di gobernacion, Gobierno a sinta cu ehecutivonan di Huston kendenan a bisa cu mester ‘Slow down’, cua pa e mandatario principal di nos pais tawata algo ilogico pa ‘slow down’ algo cu ya tawata ‘slowed down’ caba. Di parti di Citgo, nan a duna como motibo cu e fondonan no a drenta. Esaki ta un situacion cu desde principio tawata pega.
Na augustus ultimo, Minister di Energia di Venezuela, señor Quevedo, durante su bishita na Aruba hunto cu ehecutivonan di PDSVA, a duna e compromiso cu nan a haya 35 miyon florin door di un financiamento interno cu por inverti den e Fase 2. E Fase 2 en realidad tawata di september te cu fin di maart, na unda lo haci evaluacion y taxacion di e ekipo pa por haci inversionnan grandi cu ainda tin cu bin den Fase 3. Cu e Fase 2, nan lo a adapta nan plan original pa asina fin di maart nan cuminsa cu Fase 3 cu lo mester a keda cla na october 2020 segun e contract.
Actualmente, segun e ehecutivonan a indica, door di e sancionnan, e fondonan y te hasta parti di e 35 miyon florin di e Fase 2, ta core peliger cual ta trece incertidumbre pa Fase 3 si esaki ta e caso. Como Gobierno, Gabinete Wever-Croes a propone pa warda fin di maart si Fase 2 keda cla pa haya e claridad si e refineria ta factibel ainda.
Nos tin contacto cu e dirigentenan anterior y e dirigentenan nobo kendenan recien a wordo apunta. Nos tin contacto tambe cu autoridad Mericano tocante e sancionnan. Siman pasa ehecutivonan di Gobierno y di Citgo a reuni. E ultimo sancionnan cu Merca a impone riba Venezuela, tin nan impacto riba nos refineria.
Prome Minister a indica cu na e momentonan aki, Gobierno no ta den e posicion pa dicidi si awo ta e circumstancia pa kibra e contract. E atencion y enfasis di Gobierno di Aruba awo aki ta pa purba pone Citgo cumpli cu e contract. Plan A te cu Z ta pa logra pa e sancionnan wordo lanta p’asina e fondonan por wordo uza pa paga loke ta atrasa y pa paga locual mester bin ainda pa rehabilita e refineria.
Prome Minister Evelyn Wever-Croes: “E linea di comunicacion ta habri y ta bayendo bon. E compania tin hopi reto pa cumpli cu autoridad Mericano, pero e no ta imposible. Gobierno di Aruba no ta partij na esey. E ta algo cu nan mester regla pero nos ta poniendo tur presion posibel pa autoridad Mericano lanta e sancionnan.
Si esey no logra nos lo evalua e siguiente paso. Tin varios compania serio cu a mustra interes den nos refineria. Pero tanten cu nos ta mara na Citgo, nos no por negocia cu nan. Una bes cu nos no ta mara mas, nos lo negocia cu nan pa saca e miho deal posibel pa Aruba. Tanto pa trahadornan di Aruba (pago primario y secundario y siguridad di trabou), como pa Gobierno (impuesto y genera economia) como comunidad en general (cumplimento cu leynan medio ambiental, ser un “good corporate citizen”)”.
