Home » WILLEMSTAD: Medida drastico ta inevitabel pa Corsou

WILLEMSTAD: Medida drastico ta inevitabel pa Corsou

by Admin
0 comment 62 views

 

 

Willemstad – Gobierno di Corsou a haya tempo te dia 6 di maart proximo pa presenta minimalmente ANG 127 miyon como solucion pa e buraco existente den e presupuesto di 2019. En bista cu, mescos cu e dos añanan anterior, tambe pa e aña aki ta existi e menasa di un deficit presupuestario y no ta cumpli cu e rekisitonan di e Ley di Reino di supervision financiero, mester di medida riguroso i urgente pa trece ordo den e presupuesto di Corsou. E medidanan aki mester sigui tin efecto durante mas aña, pasobra tambe den e añanan ey ta existi e menasa di deficit considerabel.

 

Ministro Gijsbertha a indica anteriormente caba cu, a base di e entradanan fiscal decepcionante, e lo reduci e calculacion original di e entradanan ey cu ANG 92 miyon den e presupuesto di 2019. Riba esey mester tene cuenta adicionalmente cu un ahustacion bay abou di por lo menos ANG 35 miyon den e otro entradanan. Por lo tanto, Gobierno lo mester presenta en total na 2019 minimalmente ANG 127 miyon na medida real di aumento di entrada y/of medida di reduccion di gasto. Como consecuencia di e aumento di e gastonan medico y di e gastonan di e fondo di behes (AOV), tambe ta spera deficit a largo plaso den e fondonan social. Esakinan lo aumenta te na ANG 1.250 miyon na 2028. Presidente Raymond Gradus ta declara al respecto: “Pa por garantisa e previsionnan aki tambe pa e generacionnan futuro, ta bay tin mester di reforma cu ta haci e presupuesto di mas aña realista y sostenibel”.

 

Gobierno di Corsou ya a presenta un serie di medida caba, manera un paro di obligacion, paro na entrada nobo den servicio y continuacion di tumamento di decision tocante indexacion di e personal gubernamental. Sinembargo, Cft a pidi un pakete completo di medida cu, pa 2019, ta ascende minimalmente na ANG 127 miyon, y tambe pa mas aña ta pone ordo den e presupuesto. Adicionalmente Cft a pidi pa inventarisa e demas riesgonan pa e presupuesto, manera e convenio di enseñansa, e gastonan adicional di HNO, e debenan restante di Sehos y e deficit di explotacion di C-Post, y suministra cobertura pa nan. Pa efectua esey Cft a duna Gobierno tempo te pa mas tarda 6 di maart proximo, pa por tuma na consideracion revision di e presupuesto door di un comision institui pa tal fin. Esaki mester conduci na un modificacion di presupuesto, cu mester entrega na Parlamento prome cu dia 1e. di april.

 

Durante su bishita na Corsou Cft a combersa cu Gobernador, Conseho di Ministro, Ministro di Finansa, e Comision Financiero di Parlamento y e directivanan di Sehos y SVB. Tambe a tuma luga un reunion cu Ministro di Finansa, SOAB, Controlaria General di Corsou y Cft pa discuti e trayecto pa yega na un declaracion aprobatorio di accountant di e cuenta anual di 2021. Cft ta consisti di e siguiente miembronan: Raymond Gradus (presidente), Gregory Damoen (miembro designa pa Corsou), Henk Kamp (miembro designa pa Hulanda) y Russell Voges (miembro designa pa Sint Maarten).

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio