Calabas – Diamars 19 mfebruari pa mas o menos 7:45 p.m, informacion a drenta cu un avion a cay den area panort di Aruba.
Poco poco a cuminsa verifica e sitio y a bin compronde cu lo ta na Calabas, e caminda cu ta bay pa Gabilan.
Di ora cu e melding a drenta por a mira y scucha unidadnan di rescate cu sirena y zwaailicht ariba camindanan, tur bayendo direccion Calabas.
Na prome instante tawata papia cu e avion cu a resulta di ta un avioneta lo a cay patras di Phillip Animal Garden.
Esaki a causa cu algun unidad di rescate tawata bay e area ey.
Despues cu e minuutnan a sigui pasa, a bin haya sa unda ela cay tawata den mondi di Calabas. Esaki segun nos a compronde tawata cu ayudo di algun Mountain Bikers cu a mire bin for di direccion Oost, y bay cay den e mondi cera. Pues nan ta esnan cu a guia autoridad pa yega unda e avion tawata. Den e mesun rosea nos ta bisa tambe, cu Aruba mester di su propio Helicopter. Diamars anochi esaki tawata mas cu obvio, momento cu esnan cu mester yega unda e avion cay no tawata sa e caminda, y basa ariba gritonan di otro coleganan a yega unda nan tawata. Esaki no por ta asina, y mester a wordo regla hopi tempo atras caba.
Manera nos sa tawata trata di un
Avion model Piper PA308 cu registracion N23408 procedente di St Domingo.
Fuel lo a caba y manda Mayday. E avion tawata tin contacto cu Air Traffic Control, y cu a haci un bon trabou door di guia e piloto. E vuelo tawata aparentemente legal segun nos a compronde, pues nan lo tawata tin un Flight Plan.
Abordo tawata tin 2 persona, cu a sali unicamente cu algun rasca y poco susto di e avioneta.
Diamars anochi despues cu e yuda e piloto y pasahero sali di e avion y e mondi cera por a scucha hopi storia, kiko ta berdad of no, autoridad ta esun cu tin e trabou pa haci e investigacion necesario.
Nos a combersa ampliamente cu un piloot cu tin hopi aña den e mundo di aviacion.
Nos a puntre kiko tin di berdad y kiko por ta fabrica di e caso aki.
Ela bisa e no por bisa si tin algo di “gañamento” den e caso aki, paso ta trata di vuelo legal y tanto Curacao y Aruba tawata tin contacto cu e Avion.
Na e sitio mesora a cuminsa circula of miho bisa specula cu ta trata di un dropping.
Segun “nos” piloto cu ta e experto, “ken den nan sano juicio ta bay trece droga di Santo Domingo pa Aruba, den un avion di 1 motor anochi y ariba un distancia di 400 nautical miles”, niun hende den nan sano juicio lo haci esey segun e piloto. E parti aki autoridad local ta esun cu lo mester investiga esey.
Loke si por a pasa y cu ta make sense, cu sea e piloto no a tank e avion full y a haye cu un “Flame Out” loke ta un terminologia usa den mundo di aviacion. Esaki kiermen cu e fuel di e avion a caba y ela Glide bin abou.
Segun nos piloto, e piloto di e avioneta a haci un tremendo trabou pa baha e avion di e manera ey anto anochi y sali cana tambe. Paso loke tambe por a pasa ta cu e avioneta por a bin strit abou cu nanishi causa door cu e ta Stall (bo no tin aire mas ariba bo controlnan), pero danki Dios esey no a sosode. Pues no por papia cu e avion a cay directamente.
Momento cu e piloto a sali di e avion a puntre kiko a pasa, ela contesta cu e ela calcula e biento malo door cu e ela haye cu Head Winds fuerte esta biento duro di frente, cu ta causa cu e avion ta bay usa mas fuel cu normal. Cu lo ta un contesta honesto segun e piloto cu nos a sinta cune.
Ela sigui conta cu si e avion tawata tin mas altura, elo por a baha sin ningun problema pariba of den area di Boedoei. Tin un caminda eynan esta pariba di Boedoei cu elo a baha sin ningun problema, y tawata tin luna cla cu ta yuda tambe
Pero si ela bahe panort di Aruba, ambos lo no a sobrevivi e impacto.
Di e manera aki nos a haya informacion for di un experto, di mas o menos kiko tur por a pasa.
Loke ta keda awor ta pa autoridad caba cu nan investigacion y laga sa si tawata tin algo ilegal si of no, tanto e piloot y e pasahero a wordo separa di otro y transporta pa diferente warda di polis pa durante dia cuminsa cu e interogacionnan.
