Observacion y un mensahe importante pa esnan concerni, manera mayornan, gobernantenan y institutonan cu ta sali na vanguardia di nos muchanan. Aki ta sigui loke un habitante di Paradera a conta nos.
“Diabierna mainta mi a dicidi di lanta tempran algo pasa di 6’or di mainta pa mi bay un Supermercado no mucho leu di mi cas, mi ta gusta madruga, paso asina mi tin mas ora pa disfruta di mi dia. Caba di sali for di e Supermarket, bandi 6’or y 20 ney, scurito asina, bayendo direccion di cas, mi ta nota un auto ta baha un un mucha homber chikito di 7 pa 9 aña na e rotonde Paradera, e criatura cu su uniform di scol bisti y su tras riba su lomba den e scuridad di mainta, tabata cana spanta y lihe bay direccion di scol.
ESAKI TA E SCURIDAD DI MAINTA, CU E CRIATURA MESTER ENFRENTA
E auto a sigui bay abou, como un mayor responsabel, mi a haya hopi duele di e criatura, mi a core poco poco tira bista pa mira pa e yega scol sin cu nada pase. Ela core drenta cura di scol y lo a bay sconde, paso mi no a mire mas. Na Paradera tin dos scol basico y un scol preparatorio, na e otro scol basico pa mi sorpresa mi ta mira un mucha muher di no mas cu 8 aña su so sinta recht canto di cura di scol den tur e scuridad di mainta. Esaki sigur ta algo hopi tristo mes, con e criaturanan aki por siña den tur trankilidad ? Si tur mainta nan bida ta core peliger.
MUCHA MUHE SINTA SU SO, YEN MIEDO
Mi no ta culpa e mayornan, pero e comunidad, e sistema, di no ta tene cuenta cu e mayornan cu tin yiu chikito cu tin cu bay scol, bo no por ponenan traha 7’or di mainta, paso nan mester hiba nan yiunan scol, pakiko no ta acomoda mayornan cu tin cu hiba yiu chikito scol cu un schedule flexibel. No ta tur mayor tin transporte of opvang pa nan yiunan den ora di mainta.
Mi ta di opinion cu e mama of tata no a baha e mucha asina tempran paso e tin smaak, mi ta convenci cu ela haci esaki paso e lo mester cuminsa traha 7’or y e hefenan di trabou no ta tene consideracion cu yiunan di nan empleadonan, prome cos un hefe lo por bisa e mayor, “ya esey ta bo problema, esey ta bo asunto, abo mester regle, busca otro trabou of bay cobra onderstand”.
Hopi papiamento tabata tin, hopi a haya duele di loke a pasa na November 2017 cu e angelitonan, pero ta mustra cu hopi a lubida e dos angelitonan aki caba. No por ta asina cu un mayor mester baha su yiu di mas o menos 8 aña den un scuridad, lague su so cana bay te scol y keda para mas cu mey ora su so dilanti di un scol bandona, esey ta expone e criatura na peliger, tin hende eyfo cu mente maligno, auto por dal’e, cacho por mord’e, choller por molesti’e etc. Tur esaki Djes pa cumpli cu e orario di trabou?
Pakiko no ta lague cuminsa 8’or di mainta cu e por baha su yiu 7 ‘or y 15 na scol, esey ta ora cu tin maestro caba na scol, cu di dia a habri cu tin mas hende riba caya.
Nos tur ta responsabel pa e siguridad di nos muchanan, paso nan ta nos futuro y nan lo mester bay cuida nos ora nos ta anciano, si anos como comunidad no ta baloranan, no ta proteganan, no ta cuidanan, con nos kier pa nan bay traha, cuida y weita pa nos como anciano. Shon hefe di trabou, mayan ta e criatura ey lo mester traha pa abo por cobra bo pensioen.
Mi opinion: Mester bin leynan cu ta protega muchanan cu ta bay scol, mester bin cu oranan flexibel di trabou, pa mayornan cu tin yiunan chikito.
Mi ta sigur cu lo tin hopi mas di e casonan aki ta pasando na Aruba, no mester warda pa e baka hoga pa dempel e pos, mester actua awo! Ban stop abuso di mucha, nan mester por biba y gosa nan infancia den tur trankilidad, y sin tin miedo di bay drumi anochi y pensa cu mainta e mester cana su so den scuridad ariba un caya bandona bay scol. Como un criatura e ta algo sumamente horibel.