SAN NICOLAS – E no ta un secreto cu e comunidad di San Nicolas pa hopi aña a ser lubida y no a conoce un desaroyo manera mester ta, no obstante cu personanan cu ta bin di e area aki, ta personanan balente y trahado fuerte.
Pa hopi aña a depende di e refineria, cu tur su consecuencianan .Pa Minister Dangui Oduber e situacion di San Nicolas ta inhusto, pa cual motibo como mandatario cu ta forma parti di Gabinete Wever-Croes 1, e ta haye necesario pa enfoca den cambia e situacion. “Porfin San Nicolas ta bay conoce un desaroyo di calidad”, Minister Dangui Oduber a expresa. Desde comienso di gobernacion di Gabinete Wever-Croes 1, a inicia di biaha cu plannan pa mehora e situacion na San Nicolas, di cual awo a yega na un plan integral.
Plan integral
E plan integral pa San Nicolas ta encera diferente faceta. Lo bay inverti grandemente den e infrastructura como tambe den atraccionnan turistico.
Entre plannan tin pensa di bin cu un hotel na Baby Beach. Lo bay pone luga pa parkeer den e zona aki. Den area di Rodgers’s Beach ta bay drecha e piernan y tambe pone un facilidad nobo eynan. Lo bay inverti den canchanan deportivo y percura pa nan wordo manteni. Ta trahando pa bin cu e Fast Ferry. Lo renoba Setar Teleshop, renoba oficina di turismo y tambe lo inicia bek cu un island fest pa asina atrae e turista pa bay San Nicolas. Un otro proyecto cu ta trahando riba dje ta esun di Prinses Christina School, cual ta bay wordo converti den un facilidad multifuncional pa atrae muchanan di San Nicolas pa haci actividad fisico. Esaki ta den liñanan grandi kico tur ta bay wordo haci pa desaroyo na San Nicolas, unda ta bay enfoca pa e ta un luga atractivo pa comerciantenan tambe inverti den dje.
Contrario na e negligencia di e gobierno anterior di AVP, e gabinete aki ta bay percura pa San Nicolas conoce un desaroyo real, cual sin duda lo trece beneficio economico pa e comunidad di Pariba di Brug, como tambe pa Aruba henter.
