ORANJESTAD – Durante un conferencia di prensa dialuna mainta, Minister Dangui Oduber, mandatario encarga cu Turismo a expresa su disgusto na e manera cu ta uza NGO pa haci politica rond di e tema di proyecto hotelero y desaroyonan pa San Nicolas.
“Nos ta lamenta cu prome cu e plannan a inicia, bo ta haya NGO’s ta cuminsa cu un campaña negativo pa un desaroyo na San Nicolas. Tur hende ta consciente di e necesidad di desaroyo pa San Nicolas”, Minister Dangui Oduber a expresa den un tono serio. Segun Minister Dangui Oduber, ta trata aki di un NGO’s cu di forma publico y habri a demostra nan sosten pa e gabinete anterior di AVP. E Minister ta splica cu esaki no ta un plan nobo ni ad hoc di e gobierno aki, sino algo cu tin den desaroyo pa mas cu 20 aña. “Awe cu ta apenas papiando di un posibel desaroyo na San Nicolas, di biaha bo ta haya e NGOnan aki para den rij pa stop un desaroyo cu lo beneficia San Nicolas”, e mandatario a bisa.
Minister Dangui Oduber ta pone enfasis cu e proyecto di hotel ta forma parti di un plan integral pa desaroyo na San Nicolas. “E plan cu nos (gobierno) tin no ta solamente hotel. Tin henter un masterplan pa nos porfin duna San Nicolas e atencion cu e merece.
Nos a anuncia recientemente cu nos lo bay drecha e infrastructura di Baby Beach. Nos a bisa cu nos ta bay drecha e canchanan deportivo y percura pa nan mantene nan. A bisa cu ta bay trece mas actividad pa San Nicolas pa asina percura cu e turista ta bin akinan. Ta bay crea espacio pa parkeer, cual no tin na e momento aki. A informa comunidad cu nos ta bay drecha e piernan na Rodger’s Beach y ademas lo drecha e infrastructura como tambe crea un facilidad nobo eynan”, e mandatario a sigura.
Finalmente e mandatario a splica cu e idea ta pa gana confiansa di e comerciante, pa nan kere den e plan integral aki y asina inverti den desaroyo di San Nicolas. Como Minister encarga, conhuntamente cu demas colega Minister, ta trahando riba pasonan firme pa San Nicolas por haya finalmente un desaroyo husto, cu ta bale la pena y no ta bay laga campaña y comentarionan negativo di un NGO politicamente motiva stroba e desaroyo aki.
Keda sin haci nada pa San Nicolas NO ta un opcion mas. San Nicolas tin tur e potencial pa haya su fair share den e desaroyo di nos pais.
