Recientemente Gobierno di Aruba, den persona di Ministernan Chris Romero y Andin Bikker, a firma un acuerdo cu aerolineanan Venezolano y Arubiano cu tin buelonan directo entre Aruba y Venezuela.
E acuerdo firma ta encera un sistema di informacion di pasahero cu lo mester wordo manda pa autoridad di inmigracion adelanta, prome cu cada vuelo. E sistema aki tin e nomber di APIS (Advanced Passenger Information System) ta conoci caba mundialmente y ta wordo aplica na diferente pais caba. Na Aruba e base legal a keda formalisa y awor lo bay over na implementacion cuminsando cu e aerolineanan di Venezuela y Aruba, teniendo na cuenta e situacion actual na Venezuela. E sistema lo ta un balor agrega masha grandi pa nos pais pa sigura nos fronteranan.
Directie Luchtvaart a hunga un rol grandi den facilita e proceso aki. Di acuerdo cu Annex 9 di ICAO (Facilitation), Directie Luchtvaart ta responsabel pa implementa y vigila procesonan di facilitacion na aeropuerto, cu ta inclui e sistema aki di APIS.
