Augustus 2018 nos a wordo acerca pa dirigentenan di Princess Christina sportzaal pa wak posibilidadnan pa transforma ex Don Bosco na San Nicolas den un area multifuncional cu facilidadnan deportivo.
Hunto cu colega sr. Edgard Vrolijk, nos a acerca Minister di deporte sr. Dangui Oduber pa explora e posibilidadan aki. Y durante presupuesto 2019 a percura pa aloca fondonan necesario pa den fase por realisa e proyecto aki.
BEACH VOLLEY Y BEACH TENNIS
Awe nos ta presente na San Nicolas pa hunto cu Minister di deporte anuncia e prome fase di e proyecto aki. E prome fase lo consisti di un compleho pa practica deportenan di beach volleybal y beach tennis. Riba e potret añadi por wak con bunita e compleho lo keda unabes cu e ta cla.
MANEHO DI DEPORTE
Amplia posibilidadnan pa hobennan por recrea y practica deporte ta un aspecto cardinal di e maneho cu ta wordo hiba. Esaki nos ta wak bek tambe den e proyecto exitoso “Hoben activo hoben felis”. Na mes momento e ta fungi como un instrumento pa frena e desaroyonan social negativo.
Un pabien na San Nicolas cu e proyecto aki cual lo wordo ehecuta e aña aki ainda pa asina deporte por sigui crece na Aruba.
