Diabierna mainta Minister di Transporte, sr. Chris Romero, a atende cu un grupo di chauffeur di autobus cu tabata preparando pa sali y manifesta dilanti bestuurskantoor.
T’asina cu e chauffeurnan aki tin un cantidad di peticion pa cu nan trabou y cu nan ta desea pa Gobierno tuma den consideracion.
“Pa loke mi por a compronde for di e chauffeurnan aki, nan preocupacion principal aworaki ta e belasting cu nan tin cu paga, esta nan nummerplaat. Pa cu esaki mi ta den combersacion cu colega Minister Xiomara Ruiz-Maduro caba pa asina nos yega na un solucion satisfactorio pa tur partido envolvi”, Minister Romero a duna di conoce.
Un otro preocupacion cu a bin dilanti di parti e chauffeurnan di bus chikito ta e bushaltenan cu a wordo kita, den conexion cu reconstruccion di cierto careteranan rond di nos isla. Minister Chris Romero a duna di conoce cu “pa cu esaki nos ta trahando di serca cu e instancianan concerni pa asina, segun planning, e bushaltenan wordo poni bek na e lugarnan destina. Den coperacion cu Minister Otmar Oduber, nos ta bay trece alivio pa cu e aspecto aki lo mas pronto posibel”.
Tambe ta bon pa informa cu e trabounan pa construccion di e bañonan cu e chauffeurnan di autobus a pidi pa instala na Carnival Village, lo cuminsa entrante luna di maart proximo.
E titular di e cartera di Transporte a sigui bisa cu el a haci un peticion na e chauffeurnan pa por fabor trece nan peticionnan y mal contento por escrito y na un manera unilateral y no individual. “Mi a yega di pidi den pasado pa (chauffeur) nan uni y traha riba nan puntonan den conhunto pa asina tur nan peticionnan por haya un solucion factibel y den corto tempo. E ta hopi dificil pa tene tur hende contento y cumpli cu cada peticion individual. Ta pa e motibo aki cu mi a pidi pa por fabor trece nan puntonan den un solo documento, pa asina nos por yega na un acuerdo satisfactorio pa tur partido envolvi”, Minister Romero a reitera.
Minister Chris Romero a duna un siman di tempo pa asina tanto e chauffeurnan di autobus, como Gobierno, sinta bek na mesa y yega na un acuerdo concreto cu lo ta na beneficio di tur esnan concerni.