Recientemente Parlamentario Alan Howell a haci un peticion na Gobierno y en especial na Minister Xiomara Maduro pa mira e posibilidadnan pa realisa e acto protocolario di 18 di maart, dia di nos Himno y Bandera na San Nicolas.
Alan Howell a remarca cu reaccion pa cu e peticion pa tene e acto protocolario di 18 maart na San Nicolas a cay den super bon tera. E no a spera cu e reaccion di nos hendenan di pariba di brug lo tabata asina positivo y entusiasta. Riba Facebook tambe e pueblo di pariba di brug y San Nicolas a reacciona, comenta y aproba e iniciativa aki masalmente.
El a indica cu pueblo di pariba di brug y San Nicolas ta en espera anciosamente pa sa kico ta bay ta e desicion final di Minister Xiomara Maduro y Gobierno. Alan a termina bisando cu e ta keda optimista cu Gobierno lo honra e peticion aki y asina duna nos hendenan di pariba tambe e honor cu nan merece.