Home Police Señora di edad herida den accidente di trafico na Tanki Flip

Señora di edad herida den accidente di trafico na Tanki Flip

Tanki Flip – Diaranson atardi polis a bay Tanki Flip, pa un accidente di auto cu a dal un palo di luz.

Na yegada a resulta cu tin hende herida.
Tawata trata di un señora di edad, y cu ta sufri di presion halto.

E señora a haya golpi na cara, momento cu ela dal duro contra e palo di luz.

Loke nos a compronde na e sitio tawata cu, e señora tawata bayendo direccion pariba den su Daihatsu.
Dado momento ela kita bay na su man drechi cu e intencion pa subi caminda bek.

Solo a hunga un rol
Loke a sosode siguientemente ta cu e solo tawata asina fuerte cu ela haci cu e señora lamentablemente no a mira e palo di luz.

Manera cu e palo di luz a kibra por constata cu ela dal contra dje basta duro, heridando su mes. Dado momento e tawata bisa e agente policial cu e no por hala rosea bon.

Ambulance a tard hopi
Segun testigonan, un ambulance lo a pasa eybanda y no a ni para wak cu kiko e por yuda.

Elmar a presenta prome cu ambulance, mirando cu nan a wordo avisa cu e palo di luz ta wanta ariba algun waya, y cu ta un ora pa otro e ta bin abou.

Despues cu e señora di edad herida a warda hopi, ambulance a yega y a cuminsa trate.
No ta conoci si a duna un motibo pa kiko a tarda asina hopi.

Mester bisa tambe, cu no ta tur ora e tipo di tardansanan aki ta tuma luga.
Hopi biaha polis ta yega, ya ambulance tey y ta tratando e herido.