Home Local Oficina Integridad Aruba: A DUNA INFORMACION NA VARIOS SINDICATO DI EMPLEADO PUBLICO

Oficina Integridad Aruba: A DUNA INFORMACION NA VARIOS SINDICATO DI EMPLEADO PUBLICO

Durante un reunion dia 12 di februari 2019, a duna informacion encuanto ‘Bureau Integriteit Aruba’ (BIA) y di e trabounan cu Departamento Recurso Humano (DRH) ta haci rib’e tereno di stimula conscientisacion encuanto integridad den e aparato gubernamental. A duna informacion di BIA como cu e ta un departamento nobo di gobierno cu ta parti di Ministerio di Asuntonan General, Integridad, Cuido Gubernamental, Innovacion y Energia.

 

Durante e sesion na cual sindicatonan SADA, SEPPA, SIMAR, SINBA y TOPA tabata presente, kwartiermaker (lider di proyecto) sra. mr. Amalin Flanegin a splica e mision di BIA (cu ta salvaguardia y promove integridad den  gobierno, su institutonan y empresanan y di e empleadonan publico y demas trahadonan den gobierno, den e institutonan y e empresanan di gobierno) y e tareanan primordial di e departamento nobo aki.

 

Durante e presentacion a splica dicon ta importante pa enfatisa riba integridad, norma y valornan y e consecuencia negativo ora cu falta integridad den un organisacion of comunidad henter: esta corupcion. Corupcion tin como consecuencia cu placa cu mester uza pa bienestar di un pais, ta  desparce pa otro metanan di interes personal cu no ta na favor di e pais. E ciudadonan di un pais ta depende di servicio publico y tin derecho riba organisacionnan, “bestuurders” y empleadonan publico cu ta integro den ken nan tin confiansa.

 

BIA lo uza diferente instrumento pa realisa su obhetivonan principal. BIA su tareanan y metanan aworaki ta regla den e mesun decreto cu a institui’e pero e intencion ta cu lo regla BIA den un ley formal. Actualmente ta preparando pa operacionalisa BIA mas lihe posibel entre otro pa adkeri e personal necesario, e hefe di BIA, e ubicacion y ta traha riba formulacion di maneho y  diferente proceduranan.

 

E tareanan principal di BIA lo cubri e tres siguiente areanan:

1) prevencion pa medio di conscientisacion encuanto significacion di integridad,

2) traha maneho y duna conseho riba e manera con pa preveni y conscientisa encuanto

   integridad y

3) ta un punto pa entrega notificacion di posibel violacion di integridad, “screen” e informacion ricibi y despues pasa e informacion pa otro instancia (judicial)/autoridad pa nan haci un investigacion mas profundo di e notificacion.

 

BIA ta bay contribui, eherciendo e tareanan menciona, na implementacion di e Tratado di Nacionan Uni contra Corupcion, New York, 31 di october di 2003 (Tratado contra Corupcion).

Ademas di presentacion encuanto BIA, funcionarionan di DRH, a duna presentacion di e instrumentonan cu por uza pa stimula conscientisacion encuanto integridad den departamento gubernamental, manera por ehempel training di performance management y introducion di Codigo di Conducta (“gedragscode”) y Reglanan pa cada departamento (“huisreglement”).

BIA su so no por crea un comunidad y specificamente un aparato gubernamental integro. Ta tur sector di comunidad mester hunga nan rol y tuma nan responsabilidad na serio pa preveni y combati corupcion den aparato gubernamental.