Home Politics Minister Dangui Oduber: renobacion y expansion di ImSan canando segun plan

Minister Dangui Oduber: renobacion y expansion di ImSan canando segun plan

 

ORANJESTAD – Diamars atradi Minister di Salubridad Publico sr. Dangui Oduber haci un site visit na ImSan na San Nicolas pa wak e progreso di e proyecto di renobacion y expansion. Un bunita proyecto cu a cuminsa na juli di 2018 caminda tin un inversion di 60 miyon florin cu lo brinda empleo na 45 persona. Minister Oduber a trece dilanti cu tur cos ta canando segun schedule y cu bon supervision.

E proyecto aki lo consisti di renobacion y e re-diseño di e Spoed Eisende Hulp, lo construi 2 sala di operacion general. Lo bay construi un sala di operacion specialmente pa oncologia (operacion di wowo).       Den e proyecto aki Aruba lo haya su prome clinica di Radioltherapia, actualmente tin un bunker ta wordo construi pa atende pashentnan cu ta wordo diagnostica cu cancer. Ora cu e clinica di Radiotherapia ta den funcion, esaki ta premira pa atende alrededor di 400 pashent pa aña. Pashentnan cu ta sufri di cancer ta wordo trata cu bestraling aki mes na Aruba den cercania di nan famia y cu e mihor aparato riba mercado. Di e manera aki aki nos ta mehora e calidad di nos cuido medico y reduci gastonan di AZV.

Acreditacion

E proyecto ta canando segun e standard y guia di “Baptist Health International” cu e meta pa wordo acredita internacionalmente. “Baptist Health International” ta un di e grupo di hospital mas grandi na USA y via “Joint Commission International Accreditation” (JCI) ImSan lo wordo acredita internacionalmente. Aruba lo bira e di 3 pais den Caribe cu tin un instituto cu ta acredita pa JCI, Colombia y Hulanda mes tin 4 instituto cada uno. E acreditacion aki ta haci posibel tambe pa Aruba bay den e direccion di turismo medico, ya cu e seguronan medico internacional ta traha cu institutonan cu ta acredita pa JCI asina Minister Oduber a duna di conoce.

Despues di 10 aña cu e proyecto aki tabata den lachi y pa motibonan politico ex gobernantenan a nenga pueblo di Aruba un mihor cuido medico. Awor pueblo di Aruba bou maneho di Minister Dangui Oduber ta haya un bunita proyecto cu lo contribui na mehora e calidad di nos cuido medico, lo crese nos economia y lo crea trabou.

Minister Oduber a expresa di ta orguyoso cu e team di ImSan y ta gradicinan pa e bunita trabou cu nan ta haci pa mehora e calidad di cuido medico aki na Aruba.